«Շերեմետևո» օդանավակայանում ոստիկանությունը ձերբակալել է կոլումբիացի քահանայի, որը թմրանյութերի հսկայական քանակություն է փոխադրել: Պադրե Ֆաբիոն հավաստիացրել է, որ Ռուսաստան է ժամանել միսիոներական առաքելությամբ: Թե խոսքը հատկապես ինչի մասին է եղել՝ պարզ է դարձել, երբ քահանան հանկարծ իրեն վատ է զգացել, և նրան առաջարկել են լվանալ ստամոքսը: Այս մասին հայտնում է vesti.ru-ն:
Պադրե Ֆաբիո Ռիկարդո Ռոդրիգեսի «հարուստ ներաշխարհը» ոստիկանները պատահաբար են բացահայտել: Սկզբում ստամոքսի լվացմանը կտրականապես ընդդիմացող քահանան ի վերջո հանձնվել է, երբ նրան բացատրել են, որ հապաղելու դեպքում ուշ կլինի:
Քահանայի ինքնազգացողության վատացումը կասկածելի է թվացել անցակետի աշխատակիցներին: Պարզվել է, որ նա կուլ է տվել կոկաինով լի 18 պահպանակ:
Քահանան ճանապարհի համար փաստաթղթերի մի խուրձ է վերցրել, նաև՝ sim-քարտեր, որոնցով պետք է կապվեր իրեն դիմավորողների հետ: Դրանցից պարզվել է, որ նա աստվածաբանական գիտությունների թեկնածու է, ձեռնադրվել է 1995-ին: Նա Կարիբյան շրջանի անգլիական եկեղեցու քահանա է, կարող է ժամերգություններ ու արարողություններ կատարել հավատացյալների իր խմբի համար:
Ներկայումս նա Խիմկիի բանտում է: Քահանան, հավանաբար, առաջիկա 10-15 տարին կանցկացնի ճաղերի հետևում:
