Նախորդ տարվանից Պոլիտեխնիկական համալսարանում սկսված խնդիրները հանգուցալուծում կստանան ապրիլ-մայիս ամիսներին, երբ բուհի ռեկտորի ընտրությունները կկայանան: Բուհում սկանդալ ծագեց այն ժամանակ, երբ Facebook-ում հայտնվեց ռեկտորի ժամանակավոր պաշտոնակատար Հովհաննես Թոքմաջյանի և համալսարանի աշխատակիցներից մեկի ինտիմ խոսակցությունը: Այդ երկխոսության մեջ վիրավորական արտահայտություն կար նաև ԿԳ նախարար Արմեն Աշոտյանի հասցեին:
Գործով քննությունն ընթացքի մեջ է: Մեզ հետ զրույցում Հովհաննես Թոքմաջյանը նշել է, որ սեպտեմբերի 5-ին իր անունից իր ֆեյսբուքյան էջը ջարդելով՝ մտացածին տեղեկատվություն է տարածվել, որի փաստով քրեական գործ է հարուցվել, տեղեկատվությունը մեծ հնչեղություն է ձեռք բերել: «Կան մարդիկ, որ ցանկացել են պոլիտեխնիկը վերածել ճահճի, որպեսզի «ձուկ» որսան, դա թույլ չենք տա…»,- ասել է Հովհաննես Թոքմաջյանը:
Բուհի ռեկտորի ընտրությունների օրը դեռ պարզ չէ, քանի որ մրցույթը դեռ հայտարարված չէ: Ինչպես տեղեկացրել ենք, Պոլիտեխնիկական համալսարանը դարձել է հիմնադրամ, հոգաբարձուների խորհուրդը մարտ ամսին կձևավորվի, իսկ ընտրությունները նախատեսված են ապրիլի վերջին կամ մայիսի սկզբին:
Սեպտեմբերի 5-ի իրադարձություններից հետո բուհում նոր խնդիրներ, սկանդալներ ծագեցին: Տեղեկատվական և հեռահաղորդակցական տեխնոլոգիաների վարչության պետ Վլադիմիր Խոյեցյանն ահազանգեց, որ ռեկտորի սեքս սկանդալի համար փորձում են իրեն մեղադրել և արշավ են սկսել նաև պրոռեկտոր, ֆիզիկայի ամբիոնի վարիչ Աշոտ Խաչատրյանի դեմ:
Դեկտեմբերին թվում էր՝ կրքերը բուհում հանդարտվել են: ՀՀ կրթության և գիտության նախարար Արմեն Աշոտյանը ՀՊՃՀ-ի ուսանողական խորհրդի 20-ամյակին նվիրված տոնական միջոցառմանը ասաց՝ Պոլիտեխնիկի մեծագույն արժեքը ուսանողությունն է, Պոլիտեխնիկի մեծագույն արժեքը բոլոր ժամանակներում եղել և մնում է ուսանողությունը՝ իր բացառիկ կուռ համախմբվածությամբ և կառուցիկ ինժեներական մտքով:
Սակայն վերջին շրջանում Պոլիտեխնիկական համալսարանում նոր խնդիր է ծագել Հովհաննես Թոքմաջյանի և ուսանողական խորհրդի միջև։ Ուսանողական խորհրդի նախագահ, ասպիրանտ Գոռ Վարդանյանն «Առաջին լրատվական»-ի հետ զրույցում նշեց, որ ուսխորհրդի ղեկավարումը բուհի ռեկտորատն իր ձեռքն է փորձում վերցնել: Նա նշեց, որ 20 տարիներին բուհն ունի ուսանողների ինքնակառավարման մարմին, որը միշտ իր աշխատանքի մեջ շոշափել է ուսանողների շահերը, բուհի անունը միշտ բարձր պահել:
«Հարցեր առաջացան այն ժամանակ, երբ մենք մեր ինքնավարությունը և ՀՀ օրենքները պահելու համար որոշեցինք շարժվել մեր օրենքներով և գիտական խորհրդի անդրանիկ նիստում առաջին և երկրորդ օրակարգային հարցերում, ուսանողական գիտական ընկերության կանոնակարգի մասին, խոսվում էր մեր ինքնավարության մասին: Առաջինում նշված էր, որ գիտական խորհուրդը պետք է ուսանողական խորհրդի ստեղծման և գործունեության կարգը հաստատի, երկրորդում՝ ուսանողական գիտական ընկերության կանոնակարգն էին դրել հաստատելու: Դա այն դեպքում, երբ օրենքին հետևելով, օրենքով սահմանված կարգով, ամսի 2-ին ուսանողական խորհուրդը ներկայացրել էր նախարարի հաստատմանը («Կրթության մասին» օրենքի հոդված 28.10, և «Բարձրագույն և հետբուհական կրթության մասին» օրենքի 17-րդ հոդվածի 7-րդ կետ)»,- ասաց ուսխորհրդի նախագահը:
Նա նշեց, որ թեև ռեկտորի պաշտոնակատարին տեղեկացրել են, այնուամենայնիվ, հարցը դրեցին քվեարկության և քվեարկեցին՝ ի վնաս ուսխորհրդի, որից հետո դիմել են նախարարության: Նախարարությունը դեռ չի արձագանքել: Այնուամենայնիվ, Գոռ Վարդանյանի խոսքով, լարված մթնոլորտը բուհի ներսում պահպանվում է, լարվածությունը շարունակվում է:
Ռեկտորի պաշտոնակատարի նշանակման 11 ամիսների ընթացքում ուսանողական խորհուրդն աջակցել է ռեկտորին ծագած խնդիրների և հարցերի ժամանակ: Հիմա ուսխորհրդի նախագահը հարց է տալիս՝ լեգիտիմը մե՞նք ենք, թե՞ պաշտոնակատարը, որը նշանակված է, ոչ թե ընտրված:
«Քանի որ մոտ ապագայում ռեկտորի ընտրություններ են, և ուսանողական համակազմը ուսանողական խորհրդով ներկայացնում է ուսանողությունը՝ ութ հոգու միջոցով, այդ ութ հոգու ներկայացնելու հարցն է, և փորձում են 25 տոկոսի հարցը ապահովագրել: Այլապես ինչո՞ւ հիմա առաջացան այս հարցերը, երբ 11 ամիսների ընթացքում ռեկտորի ժամանակավոր պաշտոնակատարի պաշտոնավարման ընթացքում այս հարցը չի առաջացել»,- ասաց Գոռ Վարդանյանը:
Երկուշաբթի ռեկտորի պաշտոնակատարը հրաման է տվել գիտական խորհրդի որոշումը ժամանակավորապես կասեցնելու մասին և դիմել է նախարարություն:
Ուսանողական խորհրդին ձեռք չի տալիս, որ բուհը հայտնվել է լրատվամիջոների ուշադրության կենտրոնում: Իսկ մեր ունեցած տեղեկություններով՝ բուհի խնդիրները, վատառողջ մթնոլորտը հոգնեցրել և հիասթափեցրել են նախարարին: Բուհում վերջին մի քանի ամսիներին արդեն չորս սկանդալ է առաջացել՝ սկսած սեքս-սկանդալից, դասախոսների ազատումից, ուսխորհրդի հետ ծագած խնդիրներից: Եվ հարց է առաջանում՝ ինչպե՞ս է ստացվում, որ դեկտեմբերին շնորհավորում են բուհի ուսխորհրդի 20-ամյակը, այդ ժամանակ ուսխորհուրդը լեգիտիմ էր, փետրվարի սկզբին այլևս լեգիտիմ չէ՞:
Մեր ունեցած տեղեկություններներով՝ ԿԳ նախարարությունն այս օրերին բուհում անցկացրած ստուգումներն ավարտվել են: Առաջիկայում կհրապարակվեն ստուգումների արդյունքները: Միջանկյալ արդյունքներն արդեն պատրաստ են: Ուսումնասիրություններն ավարտվել են:
Ամբողջ պայքարը ռեկտորատի և ուսխորհրդի միջև առաջիկա ընտրություններին հոգաբարձուների խորհրդում ուսանողների՝ 25 տոկոս ձայնի ապահովումն է, և ամբողջ խնդիրը ոչ թե կանոնադրությունն է, այլ ընտրությունները:
Թե ով կլինի ՀՊՃՀ-ի ռեկտորը՝ դժվար է ասել, բայց միանշանակ է, որ Հովհաննես Թոքմաջյանի համար լավ ժամանակներ չեն:
