Հայ ազգային կոնգրեսի ներկայացուցիչ Դավիթ Շահնազարյանը, այսօր ՄԱԱ-ում անդրադառնալով Երևան-Ստեփանակերտ չվերթի շուրջ Ադրբեջանից հնչող հայտարարություններին, նկատեց. «Ադրբեջանը հայտարարեց, թե երբեք քաղաքացիական օբյեկտների վրա ուժ չի կիրառել: Սա բացարձակ սուտ է, հենց Ստեփանակերտի օդակայանում, երբ այնտեղ գտնվում էր մարդատար ինքնաթիռ` գնդակոծվեց ադրբեջանական ուժերի կողմից, և ըստ էության հասցվեց շատ մեծ վնաս, մարդկային զոհեր եղան: Մինչև Շուշիի ազատագրումը` Շուշիից գնդակոծվում էր ողջ Ստեփանակերտը` ներառյալ մանկապարտեզներն ու դպրոցները»,- հիշեցրեց բանախոսը:
Ինչ վերաբերում է Երևան-Ստեփանակերտ հնարավոր կանոնավոր չվերթի իրականացմանը` Դ.Շահնազարյանը նշեց. «Ես վստահ չեմ, որ Հայաստանի իշխանությունները ճշգրիտ և մինչև վերջ հաշվարկել են այս ամենը: Շատ կուզենայի սխալված լինել, բայց կարծում եմ, որ ամեն ինչ չէ, որ մինչև վերջ հաշվարկված է` թե՛ միջազգային իրավունքի ոլորտում, թե՛ հնարավոր արձագանքների, թե՛ հետևանքների պարագայում: Արդեն կարծես հայտարարություններ են հնչում, թե կարող է մայիսի 9-ին հայտարարված թռիչքը հետաձգվի: Սա ապացուցում է այն պնդումը, որ Հայաստանի իշխանությունները ոչ ճշգրիտ են հաշվարկել»:
Դ.Շահնազարյանը պարզաբանեց. «Հարցը օդանավակայանի բացմանը չի վերաբերում, այլ` չվերթների ապահովմանը: Մի քանի շատ կարևոր բաղադրիչներով` ոչ միայն անվտանգության, այլև միջազգային իրավունքի տեսանկյունից ես չեմ կարծում, որ սա այդքան հեշտ լուծվելիք խնդիր է: Եթե այդքան հեշտ լիներ, ապա վաղուց Մոսկվան նման թռիչքներ կիրականացներ Մոսկվայից Սուխում: Այս պարագայում Մոսկվան նույնիսկ ավելի շատ հիմքեր ուներ, քանի որ ճանաչել էր Աբխազիան` որպես անկախ պետություն»: