Թուրքիայի մի քանի քաղաքներում մեկնարկող անկախ ֆիլմերի փառատոնի ժամանակ ցուցադրվելու է նաև Սերգեյ Փարաջանովի «Նռան գույնը» ֆիլմը, որը թուրքական «Հաբերթյուրք» պարբերականը դասել է «անպայման դիտելու համար» ֆիլմերի շարքում:
!f (Իֆ) անունը կրող կինոփառատոնը կմեկնարկի փետրվարի 12-ին և կշարունակվի մինչև մարտի 1-ը: Փետրվարի 12-ից 22-ը կինոփառատոնն անցկացվելու է Ստամբուլում, ապա շարունակվելու է Իզմիրում և Անկարայում՝ մինչ գարնան առաջին օրը:
Փարաջանովի հայտնի ֆիլմը ցուցադրվելու է «Իֆ Կուռքեր» բաժնում: «Հաբերթյուրքի» լրագրողները ֆիլմը ներառել են հատուկ ցուցակում, որտեղ տեղ են գտել «անպայման դիտելու համար» 10 ֆիլմեր:
«Նռան գույնը» ֆիլմի մասին թուրքական աղբյուրի անդրադարձում նշվում է, որ այն հեղինակել է Սերգեյ Փարաջանովը 1968 թվականին, ֆիլմը հայտնի հայ երաժիշտ Սայաթ-Նովայի մասին է: Հոդվածում ֆիլմը որակվում է որպես «դասական», ինչպես նաև այն բնութագրվում է որպես «մի շարք ռեժիսորների համար ներշնչանքի աղբյուր հանդիսացած ֆիլմ»:
Նշվում է նաև, որ «Նռան գույնը» ֆիլմը Խորհրդային Միությունում արգելված է եղել, իսկ Ստամբուլում ցուցադրվելու է Մարտին Սկորսեզեի ղեկավարած հիմնադրամի կողմից վերականգնված տարբերակը:
