Թուրքիայի նախագահ Ռեջեփ Թայիփ Էրդողանը դժգոհ է երկրի հետախուզության ղեկավար Հական Ֆիդանի պաշտոնաթողությունից։ Այս մասին հայտնում է Milliyet-ը՝ հղում անելով պետության ղեկավարի խոսքերին։ Էրդողանի խոսքով՝ ինքն արդեն խոսել է վարչապետի հետ Ֆիդանի պաշտոնաթողության առնչությամբ։
«Ես հավանություն չեմ տալիս Ֆիդանի հրաժարականին։ Այնուհանդերձ, ես իրավունք չունեմ միջամտելու վարչապետ Ահմեդ Դավութօղլուի գործերին»,- ասել է նախագահը։
Թուրքիայում հետախուզության ղեկավարի հրաժարականն ընդունում է վարչապետը։
Հետախուզության ղեկավարը հրաժարական է տվել փետրվարի 7-ին, քանի որ մտադիր է մասնակցել ընթացիկ տարվա հունիսի 7-ին կայանալիք խորհրդարանական ընտրություններին։
Հական Ֆիդանը նշանակվել է թուրքական հետախուզության ղեկավար 2010-ի մայիսի 25-ին։
Երկրի խորհրդարանական ընտրություններին կմասնակցեն 31 կուսակցություններ։
Համաձայն Թուրքիայի օրենսդրության՝ ընտրություններին մասնակցել ցանկացող անձինք պետք է զբաղեցրած պաշտոններից հրաժարական տան մինչև փետրվարի 10-ը։
