Չինացի գիտնականները կարողացել են հաջող փորձարկումներ անցկացնել, որոնց արդյունքում կովերից ստացել են մայրական կաթ` կովի էմբրիոններում ներդնելով մարդկային գեներ, որոնք պատասխանատու են մայրական կաթի քիմիական կառուցվածքի համար: Այս մասին հաղորդում է The Daily Mail-ը:
Այս գործողությունն իրականացնելու համար օգտագործվել է կլոնավորման մեթոդը: Այս կաթն իր քիմիական կառուցվածքով ոչնչով չի զիջում մայրականին, պարունակում է մեծ քանակությամբ օգտակար սննդարար նյութեր, որոնք անհրաժեշտ են երեխայի իմունային համակարգն ամրապնդելու համար:
Չինացի գիտնականները կարծում են, որ 300 կովերից ստացված այս կաթը թույլ կտա ոչ միայն փոխարինել մայրական կաթը, այլ նաև սրանց հիմքի վրա մանկական կերերի խտանյութեր ստանալ: Գիտափորձերի ղեկավար պրոֆեսոր Նին Լին հայտարարել է, որ այս կաթն ավելի վտանգավոր չէ, քան սովորական կաթը: Ըստ պրոֆեսորի` այդ կաթը կարելի կլինի գնել խանութներից արդեն 10 տարի հետո:
