Ապրիլի 7-ին Երևանում` «Արմենիա-Մարիոթ» հյուրանոցում տեղի կունենա հայ-չինական միջկառավարական հանձնաժողովի 6-րդ նիստը:
Հանձնաժողովի համանախագահներն են` հայկական կողմից ՀՀ էկոնոմիկայի նախարարի տեղակալ Արա Պետրոսյանը, չինական կողմից ՉԺՀ առևտրի նախարարության Եվրոպայի վարչության պետ Սուն Իյունֆուն:
Միջոցառմանը կմասնակցեն ՉԺՀ-ում ՀՀ արտակարգ և լիազոր դեսպան Արմեն Սարգսյանը և ՀՀ-ում ՉԺՀ արտակարգ և լիազոր դեսպան Տյան Չանչունը:
Նիստի ընթացքում կողմերը կներկայացնեն երկու երկրների տնտեսական իրավիճակը, կքննարկեն հայ-չինական առևտրատնտեսական համագործակցության արդյունավետության բարձրացմանն առնչվող հարցեր, մասնավորապես` երկկողմ առևտրում ապրանքատեսակների բազմազանության ավելացման և դրանց որակի բարձրացման խնդիրները, ենթակառուցվածքների զարգացման, գյուղատնտեսության, հանքարդյունաբերության, էներգետիկայի, քիմիական արդյունաբերության, տեղեկատվական տեխնոլոգիաների և հեռահաղորդակցության ոլորտներում համագործակցության ընդլայնման, հայկական և չինական ձեռնարկությունների միջև կապերի ամրապնդման, համատեղ գործարար համաժողովների, ցուցահանդեսների, տոնավաճառների կազմակերպման հնարավորությունները, այլ խնդիրներ:
Հայ-չինական միջկառավարական հանձնաժողովի ՉԺՀ պատվիրակությանը կընդունեն ՀՀ էկոնոմիկայի նախարար Տիգրան Դավթյանը և ՀՀ էներգետիկայի և բնական պաշարների նախարար Արմեն Մովսիսյանը:
Հայաստան այցի շրջանակներում ՉԺՀ պատվիրակությունը կայցելի Ծիծեռնակաբերդ, կլինի Մայր Աթոռ Սուրբ Էջմիածնում, կծանոթանա Հայաստանի պատմամշակութային արժեքներին:
