ԱՄՆ Միսուրի նահանգում 6-ամյա տղայի մայրը, տատիկը և մորաքույրը ձերբակալվել են նրա կեղծ առևանգումը կազմակերպելու համար: Այս մասին գրում է The Guardian-ը:
Մոր կարծիքով՝ իր որդին շատ բարյացակամ էր բոլոր նրանց նկատմամբ, ում հանդիպում էր փողոցում: Եվ որպեսզի երեխային ցույց տա, թե ինչի է հանգեցնում անծանոթների հետ շփումը, ընտանիքը դիմել է ծանոթներից մեկին՝ խնդրելով առևանգել երեխային:
Երբ երեխան դուրս է եկել դպրոցական ավտոբուսից, տղամարդը նրան քարշ է տվել դեպի ավտոմեքենա՝ մեքենայում կապելով նրա ձեռքերն ու ոտքերը: Նա իր «պատանդին» ասել է, որ այլևս երբեք չի տեսնի իր մորը, և սպառնացել է գամել մառանի պատին: Որպեսզի երեխան դադարեր լաց լինել, նա ատրճանակ է ցույց տվել: Ապա տղամարդը կապել է նրա աչքերն ու տարել տան նկուղ:
Որոշ ժամանակ անց տղամարդը երեխային թույլ է տվել բարձրանալ վերև, որտեղ նրան սպասել են իր հարազատները: Նրանք սկսել են խրատել երեխային՝ «ահա թե ինչու է պետք հեռու մնալ անծանոթներից»:
Երեխայի մորն առաջադրվել է անչափահասի առևանգման և երեխայի հետ դաժանաբար վարվելու մեղադրանք: Մյուսները ևս մեղադրվում են առևանգման, դաժան վերաբերմունքի, ինչպես նաև հանցավոր անփութության մեջ: Ոստիկանության խոսքերով՝ երեխայի ընտանիքը մեղքի ոչ մի զգացում չի ապրում:
