Հայաստանում հիպերմարկետների «Կարֆուր» ֆրանսիական ցանցի առևտրական կենտրոնի բացման հնարավորությունը որոշ առումով իրարարանցում է առաջացրել հայկական իրականության մեջ: Անցած տարի սեպտեմբերին տարածված լուրերին հետևեցին տարբեր տեղեկություններ իշխանական ամենաբարձր օղակներում թեժ քննարկումների մասին, թե ՀՀ ղեկավարությունը խոչընդոտում է համաշխարհային բրենդի մուտքը Հայաստան՝ պաշտպանելով սեփական օլիգարխիկների շահերը, և որ «Կարֆուրին» ընդդիմացողների բանակը գլխավորում է Աժ հայտնի պատգամավոր Սամվել Ալեքսանյանը:
Անցած տարի դեկտեմբերին «Կարֆուրի» երևանյան կենտրոնի գլխավոր տնօրեն Վաչե Արսենը մեզ հետ զրույցում հայտարարել էր, որ «իրենք արդեն այստեղ են՝ Հայաստանում» և հավաստել էր, որ «Կարֆուր»-ը ՀՀ-ում գործելու է: Սակայն մինչ օրս «Կարֆուրից» ոչ մի նորություն չկա, և «Դալմա գարդեն մոլում» էլ անորոշ սպասումի մեջ են՝ տեղի վարձակալության մասին պայմանագիր կնքել-չկնքելու առումով: Իսկ «Հայկական ժամանակը» վերջերս գրել էր, թե հիպերմարկետների ցանցի բարձրաստիճան ներկայացուցիչներն արդեն տևական ժամանակ է, ինչ փորձում են հանդիպում ունենալ ՀՀ ամենաբարձր ղեկավարության հետ, ինչը, սակայն, նրանց ոչ մի կերպ չի հաջողվում, քանի որ նրանց հարցերին պատասխան առայժմ չկա:
Գործունեության 40 տարվա պատմություն և աշխարհի մոտ 35 երկրներում ավելի քան 15.1 հզ. առևտրային կենտրոններ ունեցող հիպերմարկետների ցանցը, որ աշխատանքով է ապահովում շուրջ 450 հզ. մարդկանց, իսկ տարեկան շրջանառությունը գերզանցում է 100 մլրդ եվրոն, պարզապես տրամաբանական չէ, որ լուռ կմնար, եթե որևէ երկրում իրեն խոչընդոտեին՝ տեղական ինչ-որ օլիգարխների քմահաճույքից ելնելով:
Այս անորոշ վիճակը պարզելու և ՀՀ-ում գործունեություն ծավալելու ծրագրերը հստակեցնելու նպատակով «Առաջին լրատվական»-ը նամակով դիմեց «Կարֆուր Գրուպին», որի տարածաշրջանային ներկայացուցչությունից՝ Majid Al Futtaim Group-ից (տեղակայված է Դուբայում) պատասխանեցին, որ «Կարֆուր» բրենդը զարգացնելու ռազմավարությանը համապատասխան, Majid Al Futtaim Group-ը շարունակում է ուսումնասիրել ու վերլուծել Հայաստանի շուկան և առաջիկա 12 ամիսների ընթացքում «Կարֆուրի» առաջին առևտրային կենտրոնը բացելու նպատակահարմարությունը:
Այսինքն, սա հաստատում է Վաչե Արսենի խոսքը, որ «Կարֆուրն» արդեն Հայաստանում է: Իսկ եթե նման բրենդը մուտք է գործում է Հայաստան, թեկուզև առայժմ ուսումնասիրությունների և հետագա ռազմավարության հստակեցման փուլում, ապա դա հույս է ներշնչում, որ այն հայ սպառողը վերջապես կունենա իրական այլընտրանք և չի մնա Լֆիկի ու մյուս օլիգարխիկների հույսին՝ թե ինչ գնով նրանք կորոշեն վաճառել այս կամ այն ապրանքը: Հայ օլիգարխները դեռ որոշ ժամանակ ունեն իրենց անելիքը որոշելու համար՝ կամ աշխատել օրինական դաշտում, կամ հեռանալ այս երկրից: Իսկ հայ սպառողը վաղուց է սպասում դրան:
Հիշեցնենք, որ «Կարֆուրի» հետ կապված ինտրիգը դրա «անկախությունն» է. այն ինքն է ներկրում իր ապրանքը՝ թե՛ սննդամթերք, թե՛ տեխնիկա, թե այլ տեսակի հազար ու մի ապրանքներ, և նրան գին թելադրելը անհնար է: Այսինքն, այն կլինի «տնտեսական առումով ժողովրդավարության կղզյակ» մեր երկրում:
Ի դեպ, 2012 թ. սեպտեմբերից «Կարֆուրը» գործում է նաև Վրաստանում՝ Թբիլիսիում:
