Արաբական Միացյալ Էմիրությունների իշխանությունները երկրում ուժի կիրառմամբ իշխանությունը վերցնելու նպատակով կազմակերպված դավադրության համար 94 մարդու մեղադրանք են առաջադրել: Տեղի իրավապահ մարմինների տվյալներով՝ նրանք բոլորն էլ ծայրահեղական իսլամիստական «Ալ-Իսլահ» խմբավորման անդամներ են, որոնք սերտ համագործակցում են «Մուսուլման եղբայրներ»-ի հետ, որոնց գործունեությունն ԱՄԷ-ում արգելված է:
Երկրի գլխավոր դատախազ Կուբաիշի խոսքերով՝ նրանք հրապարակային քարոզում էին հետևել իսլամին, սակայն իրականում գաղտնի դավադրություն էին նախապատրաստում: Նրանք ձերբակալվել են անցյալ տարվա հուլիսին՝ մուսուլմանական ծայրահեղականության դեմ պայքարի շրջանակներում:
ԱՄԷ-ի իշխանությունների տվյալներով՝ տեղի իսլամիստների գործունեությունն ընդհանուր մեծ դավադրության մի մասն է միայն կազմում: Նրանց կարծիքով՝ հիմնական վտանգը գալիս է Սիրիայի և Իրանի արմատականներից:
Անցյալ տարվա մարտին Էմիրությունների ոստիկանապետը հայտարարել էր, որ «Մուսուլման եղբայրներ»–ը կփորձեն Օմանի, ԱՄԷ–ի, Քուվեյթի, Քաթարի, Բահրեյնի, ինչպես նաև Սաուդյան Արաբիայի միապետների դերակատարությունը դարձնել ձևական, իսկ իրական իշխանությունը վերցնել իրենց ձեռքը կամ հանձնել դաշնակիցներին:
Նա նաև պնդում էր, որ «Մուսուլման եղբայրներ»–ի կողմից իրականացվող առաջին հարվածը 2013-ին կլինի Քուվեյթի ուղղությամբ, իսկ ընդհանրապես, այդ ամենը պետք է իրականացվի մինչև 2016-ը, որից հետո Պարսից ծոցում այլևս ոչ մի բացարձակ միապետություն գոյություն չի ունենա:
