Հայաստանի Հանրապետության փաստաբանների պալատի խորհուրդը 2015թ. փետրվարի 3-ին փաստաբանների պալատի խորհրդի անդամ, փաստաբան Մելանյա Առուստամյանին նշանակել է Հանրային պաշտպանի գրասենյակի նոր ղեկավար՝ չորս տարի ժամկետով:
Հանրային պաշտպանի ղեկավարին բաց քվեարկության ընթացակարգով նշանակում է Հայաստանի փաստաբանների պալատի խորհուրդը, իսկ ղեկավարի թեկնածությունն առաջարկում է Փաստաբանների պալատի նախագահը: Ինչպես տեղեկացնում է Փաստաբանների պալատի պաշտոնական կայքէջը, Հանրային պաշտպանի նախկին ղեկավար Մասիս Ղազանչյանը ազատվել էր աշխատանքից՝ սեփական դիմումի համաձայն:
Հայաստանի Հանրապետության փաստաբանների պալատի նախագահ Արա Զոհրաբյանը այսօր Հանրային պաշտպանի գրասենյակի աշխատակազմին է ներկայացրել Հանրային պաշտպանի գրասենյակի նոր ղեկավարին: Շնորհակալություն հայտնելով Մասիս Ղազանչյանին արդյունավետ աշխատանքի և Հանրային պաշտպանի գրասենյակի կայացման հարցում ունեցած անգնահատելի ավանդի համար՝ ՓՊ նախագահը նոր ղեկավարին մաղթել է բեղմնավոր աշխատանք՝ ի շահ փաստաբանական ինստիտուտի և, մասնավորապես, Հանրային պաշտպանի գրասենյակի զարգացման:
Մելանյա Առուստամյանն իր հերթին համոզմունք է հայտնել, որ ջանք ու եռանդ չի խնայի արդարացնելու թե խորհրդի անդամների և թե հանրային պաշտպանների հույսերը:
