Կենտրոն և Նորք-Մարաշ վարչական շրջանների ընդհանուր իրավասության դատարանը շարունակում է մերժել և չբավարարել բոլոր տեսակի միջնորդությունները՝ կապված «Վիտրոմեդ» վերարտադրողական առողջության կենտրոնի լաբորատորիայում բեղմնավորած սաղմի հետ:
Հիշեցնենք, որ դատարանը, ի դեմս դատավոր Գագիկ Խանդանյանի, կալանք է դրել «Վիտրոմեդ» վերարտադրողական առողջության կենտրոնի լաբորատորիայում բեղմնավորած սաղմի վրա, որը պետք է արդեն իսկ տեղադրված լիներ փոխնակ մոր արգանդում: Իսկ խնդիրն առաջացել էր այն բանից հետո, երբ քաղաքացի Նինա Կուցանյանը առողջական խնդիրներ ունենալու պատճառով դիմել էր «Վիտրոմեդ» վերարտադրողական առողջության կենտրոն՝ արտամարմնային բեղմնավորման մեթոդով երեխա ունենալու համար: Դիմելուց հետո կլինիկայի և Նինայի միջև կնքվել էր պայմանագիր, աղջիկն անցել էր բոլոր անհրաժեշտ հետազոտությունները, հայտնվել էր նաև դոնորը՝ ռազմական ոստիկանության մայոր Հովհաննես Հովհաննիսյանը, որն աղջկա նախկին ընկերն է եղել և տվել է դոնոր դառնալու իր համաձայնությունը: Սակայն աղջկա հետ վիճելուց հետո որոշել է, թե չի ցանկանում, որ իր սերմից բեղմնավորված սաղմից երեխա ծնվի:
Նինան «Առաջին լրատվական»-ի հետ զրույցում ասաց, որ դատարանը շարունակում է համառորեն չբավարարել իրենց միջնորդությունները: «Բոլոր միջնորդությունները համատարած մերժվում են: Այնպիսի տպավարություն է, կարծես դատարանը համառորեն չի ուզում հանել սաղմի վրա դրված կալանքը, ինչը հենց հայցվորի ուզածն է: Բայց դա աբսուրդ է, հասկանում եք, այստեղ խոսքը երեխայի կյանքի մասին է, որը շուտով արդեն կհայտնվի հարցականի տակ»,- ասաց Նինան՝ հավելելով, որ սաղմի պահպանման համար նախատեսված է 6-ամսյա ժամկետ, որից հետո հնարավոր է՝ այն արդեն պիտանի չլինի օգտագործման համար: Մինչդեռ նա և́ բեղմնավորման, և́ դոնորության, և́ փոխնակ մոր հետ կնքել է բոլոր անհրաժեշտ պայմանագրերը և կատարել համապատասխան վճարումները: «Հասկանում եք, չի կարող հայցի ապահովում կիառվել սաղմի վրա, այն դեպքում, երբ և́ դոնորի, և́ վերատադրողական կենտրոնի հետ առկա են պայմանագրեր՝ իրավական և բժշկական հիմքերը, իսկ հիմա նման քաշքշուկի մեջ ենք հայտնվել, ու հայտնի էլ չի, թե երբ կավարտվի այս մղձավանջը»,- ասաց Նինան:
Վերջինիս խոսքերով՝ այս ընթացքում ինքը փորձելէ բանակցել, հաշտության եզրեր գտնել դոնորի հետ, սակայն որևէ ռեալ արդյունք դեռևս չկա:
Այս աննախադեպ գործով դատական հաջորդ նիստը նշանակված է վաղը:
Լուսանկարը՝ News.am-ի
