Թուրքիայի զինված ուժերը հրապարակել են 2015 թվականի փետրվարի 1-ի դրությամբ անձնակազմի թվաքանակի վերաբերյալ պաշտոնական տվյալները։ Թուրքական զինուժի անձնակազմը շուրջ 689 հազար մարդ է, ինչը շուրջ 7000-ով ավել է 2015 թվականի հունվարի 1-ի ցուցանիշից: Անձնակազմի թվաքանակի աճը կապված է զորակոչի հետ, շարքային կազմը համալրվել է պարտադիր ծառայության կոչված շարքային զինծառայողներով:
Թուրքիայի զինված ուժերի գլխավոր շտաբի տվյալների համաձայն՝ թուրքական զինուժում գեներալների և ծովակալների թիվը 345 է, որից 312-ը՝ ցամաքային, ռազմաօդային և ռազմածովային ուժերում, 32-ը՝ ժանդարմերիայում, 1-ը՝ առափնյա անվտանգության ուժերում։ Հունվարի համեմատ գեներալների թիվը չի փոխվել:
Սպաների ընդհանուր թիվը 39 439 է, որից 32 625-ը՝ ցամաքային, ռազմաօդային և ռազմածովային ուժերում, 6261-ը՝ ժանդարմերիայում, 625-ը՝ առափնյա անվտանգության ուժերում։ Սպաների թիվը նախորդ ամսվա համեմատ գրեթե չի փոխվել։
Կրտսեր հրամանատարական կազմը 97 533 մարդ է, որից 70 651-ը՝ ցամաքային, ռազմաօդային և ռազմածովային ուժերում, 25 392-ը՝ ժանդարմերիայում, 1490-ը՝ առափնյա անվտանգության ուժերում: Այս ցուցանիշը նախորդ ամսվա համեմատ աճել է 1000-ով։
Պայմանագրային ժանդարմների թիվը 22 789 է, հատուկ պայմանագրային կրտսեր հրամանատարների թիվը` 4554:
Պայմանագրային եֆրեյտորների ընդհանուր թիվը 61 812 մարդ է, որից 43 551-ը՝ ցամաքային, ռազմաօդային և ռազմածովային ուժերում, 17 568-ը՝ ժանդարմերիայում, 693-ը՝ առափնյա անվտանգության ուժերում։ Պայմանագրային եֆրեյտորների թիվն ավելացել է 1500-ով։
Շարքային կազմի ընդհանուր թիվը 410 179 մարդ է որից 286 240-ը՝ ցամաքային, ռազմաօդային և ռազմածովային ուժերում, 122 113-ը՝ ժանդարմերիայում, 1826-ը՝ առափնյա անվտանգության ուժերում։ Այսպիսով, հունվարի 1-ի տվյալների համեմատ ժամկետայինների թիվն ավելացել է շուրջ 4000-ով։
Քաղաքացիական ծառայողների թիվը Թուրքիայի ԶՈՒ շարքերում 52 680 է, որից 48 267-ը՝ ցամաքային, ռազմաօդային և ռազմածովային ուժերում, 3500 -ը՝ ժանդարմերիայում, 913-ը՝ առափնյա անվտանգության ուժերում։
Այսպիսով, Թուրքիայի զինված ուժերի ընդհանուր թվաքանակը 689 324 մարդ է, որից զինծառայողները 636 644-ն են, իսկ քաղաքացիական անձինք` 52 680-ը: Նախորդ ամսվա համեմատ թուրքական զինուժի թիվն ավելացել է շուրջ 7000-ով, ինչը կապված է հիմնականում ժամկետայինների թվի աճի հետ:
Թուրքիայի զինված ուժերում պրոֆեսիոնալ զինծառայող են ընդհանուր թվի 36 տոկոսը։ Ցամաքային, ռազմաօդային և ռազմածովային ուժերում զինծառայողների 35 տոկոսն է պրոֆեսիոնալ հիմունքներով, ժանդարմերիայում` 37 տոկոսը, իսկ առափնյա անվտանգության ուժերում` 61 տոկոսը։
Նշենք, որ Թուրքիայում գործում է պարտադիր ժամկետային զինծառայություն: Բանակ են զորակոչվում 21 տարին լրացած արական սեռի քաղաքացիները:
Թեև թուրքական զինված ուժերի անձնակազմի թվի մեջ հաշվում են ժանդարմերիան և առափնյա անվտանգության ծառայությունը, սակայն ոչպատերազմական պայմաններում այս կառույցները ենթարկվում են Թուրքիայի ներքին գործերի նախարարությանը և իրականացնում են նաև ոստիկանական գործառույթներ:
