Հայաստանի տարբեր քաղաքներում արդեն մի քանի ամիս է՝ ինչ բացվել են համաժողովրդական շարժման գրասենյակներ: Ավելի ստույգ՝ տվյալ վայրում եղած Հայ ազգային կոնգրեսի կամ «Բարգավաճ Հայաստան»-ի գրասենյակների վրա փակցվել է «Համաժողովրդական շարժման գրասենյակ» պաստառը:Վանաձորում, օրինակ, նույն անունով իրար կողք կողքի գործում են երկու կուսակցությունների գրասենյակները:
Մեզ հետ զրույցում ՀԱԿ տարածքային կառույցների ղեկավարները վստահեցնում են, որ «Բարգավաճ Հայաստան»-ի ներկայացուցիչների հետ պարբերաբար հանդիպում, քննարկում են երկրում ստեղծված իրավիճակը, իրենց հետագա անելիքները: Եռյակի մյուս գործընկերը՝ «Ժառանգությունն» այս առումով ավելի պասիվ է, քանի որ ոչ բոլոր ակտիվ հատվածներում ունի գրասենյակ և ներկայացուցիչ:
Կոնգրեսի ներկայացուցիչները, սակայն, իրենց կուսակցության տարածած հայտարարությանը համաձայն, չեն մասնակցելու փետրվարի 5-ին կայանալիք՝ ԲՀԿ առաջնորդ Գագիկ Ծառուկյանի հրավիրած խորհրդաժողովին, ոմանք ավելի կողմ են հանրահավաքային պայքարին։
Մեզ հետ զրույցում ՀԱԿ Գյումրու տարածքային կառույցի ղեկավար Մուրադ Գրիգորյանն ասաց, որ այդ համաժողովին մասնակցելու հրավեր ո́չ ինքն է ստացել, ո́չ էլ իր ղեկավարած կառույցի որևէ ներկայացուցիչ:
«Առաջին լրատվական»-ի հետ զրույցում ՀԱԿ-ի Աշտարակի տարածքային կառույցի ղեկավար Արարատ Մորիկյանն ասաց, որ խորհրդաժողովին ինքը չի մասնակցելու և միևնույն ժամանակ բացասաբար է վերաբերվում հանրահավաքային դադարին:
«Ես կողմ եմ հանրահավաքներին, և երևի այն եզակի մարդկանցից մեկն եմ, որ կողմ եմ, որ Հայաստանում հեղափոխություն լինի: Միայն ասողներ կան, քննադատողներ, բայց ես այլ ֆորմատ չեմ տեսնում, որով կարելի է հաջողության հասնել: Հիմա Տեր-Պետրոսյանի, Ծառուկյանի հասցեին մեղադրանքներ են հնչեցնում, բայց իրենք էլ գործ չեն անում: Ես մարդկանց հետ շփվում եմ ամեն օր, որ մեզնից բողոքում են, ասում ենք՝ ո՞ւմ մոտ եք ուզում գնալ, պատասխան չկա»:
Մեր զրուցակցի խոսքերով՝ հնարավոր է՝ որոշ մարդկանց սրտով չէ, բայց առանց Ծառուկյանի հնարավոր չի լինի․ «Լևոն Տեր-Պետրոսյանն ասում է՝ այդ մարդը կոալիցիա չկազմեց, առանձին ցուցակով մասնակցեց ընտրություններին, բյուջեին դեմ քվեարկեց. ես չեմ հավատում, որ այդքանը դերասանություն է, ես հավատում եմ նրա ընդդիմադիր լինելուն: Ես ուրիշ տարբերակ, բացի ՀԱԿ-ԲՀԿ-«Ժառանգություն» համագործակցությունից, չեմ տեսնում, թե ով կլինի հետո նախագահ՝ ժողովուրդը կընտրի»:
Ինչ վերաբերում է հանրահավաքային պայքարին՝ Արարատ Մորիկյանն ասաց․ «Ես շատ վատ եմ զգում դադարներից, ուզում եմ՝ գիշեր-ցերեկ պայքարենք, ժողովուրդը գա անընդհատ փողոց, մենք այս 20 տարի է՝ ոտքի վրա ենք»:
Լուսանկարը՝ armtimes.com-ի
