Քարոզարշավ իրականացնող թեկնածուներին կարելի է բաժանել երեք խմբի: Առաջին խմբում է ՀՀ գործող նախագահ Սերժ Սարգսյանը, որը ակտիվ քարոզարշավ է անցկացնում ՀՀ տարբեր մարզերում: Երկրորդ խմբում են Հրանտ Բագրատյանը, Րաֆֆի Հովհաննիսյանը և Պարույր Հայրիկյանը, որոնք իրենց հնարավորությունների չափով են քարոզարշավ իրականացնում: Իսկ երրորդ խմբում մնացած թեկնածուներն են, ովքեր գրեթե քարոզարշավ չեն իրականացնում. այսօր լրագրողների հետ հանդիպման ժամանակ, ամփոփելով նախընտրական քարոզարշավի առաջին ութ օրը, ասաց «Օրինաց երկիր» խմբակցության քարտուղար Մհեր Շահգելդյանը:
«Ես չեմ կարծում, որ որևէ թեկնածուի վարկանիշը բարձրացվում է Հանրապետական կուսակցության կողմից. այդ պնդումները սխալ են: Մնացած թեկնածուները նույնպես քաղաքական ուղի են անցել, և նրանք իրենց վարկանիշը բարձրացնելու կարիք չունեն»:
Մ. Շահգելդյանի գնահատմամբ՝ սխալ է նաև այն ձևակերպումը, թե հասարակությունն անտարբեր է գալիք նախագահական ընտրությունների հանդեպ. «Մեր ղեկավարի՝ Արթուր Բաղդասարյանի, Սերժ Սարգսյանի հանդիպումների ժամանակ այդ հետաքրքրությունը պարզ երևում է: Ես այդ հետաքրքրությունը տեսել եմ հասարակ քաղաքացիների հետ բազմիցս շփվելով»:
Հարցին՝ ովքե՞ր են այդ հետաքրքրվողները, որովհետև Սերժ Սարգսյանի հանդիպումներին ներկա են հիմնականում Հանրապետական կուսակցության մարդիկ, Մ. Շահգելդյանը պատասխանեց. «Եթե Ձեզ հետաքրքրում է, կարող եմ այդ մարդկանց ցույց տալ»:
