6 տարվա հիվանդանոցային բուժումից հետո երիկամային անբավարարությամբ տառապող տղամարդու գումարները սպառվել են, սակայն նա գտել է կենդանի մնալու միջոցը` ստեղծելով սեփական հեմոդիալիզի համար սարք: Շաբաթական 3 անգամ իր տանը զուգարանում տղամարդը գործարկում է դիալիզի սարքը, որը պատրաստել է խոհանոցային և բժշկական հին սարքավորումներից:
Տնային պայմաններում բուժման համար նա մոտ 10 դոլար է ծախսում, որը հիվանդանոցային բուժման միայն 12 տոկոսն է կազմում:
Նա նշել է, որ չնայած դիալիզ իրականացնող ինքնաշեն սարքավորման օգտագործումից իր երկու ընկերները մահացել են, այնուամենայնիվ, ինքը չի վախենում: Սարքը բաղկացած է 2 հատվածներից, որոնք միացած են մեմբրանով: Արյունն անցնում է մի հատվածով այն նույն ժամանակ երբ դիալիզային հեղուկն անցնում է մյուս հատվածով:
Տղամարդը դիալիզի համար հեղուկը ստանում է թորած ջրում նատրիումի քլորիդի, կալիումի քլորիդի և նատրիումի երկածխաթթվի խառնուրդից:
Բժիշկները զգուշացրել են, որ նա ռիսկի է դիմում, քանի որ խառնուրդը ստանալիս չի օգտագործում ստերիլ ջուր: Տղամարդուն օգնության ձեռք մեկնելու առաջարկներ են արվել, երբ նրա պատմությունը հանրության ուշադրությանն է արժանացել, սակայն նա հրաժարվել է օգնությունից` հայտարարելով, որ հիվանդանոցը շատ հեռու է իր տանից, և որ այնտեղ մարդաշատ է:
