XX դարի երկրորդ կեսի լեգենդար դերասան Ջին Հեքմենն այսօր դառնում է 85 տարեկան, հայտնում է filmpro.ru-ն: Կրկնակի օսկարակիր դերասանը նկարահանվել է ավելի քան 90 ֆիլմում: Նրա գլխավոր դերերից են Ֆրենսիս Ֆորդ Կոպոլլայի «Խոսակցություն», Ուիլյամ Ֆրիդկինի «Ֆրանսիացի սուրհանդակը», Քլինթ Իսթվուդի «Չներվածը» ֆիլմերում կերտած կերպարներն են:
Հեքմենի մանկությունը համընկել է Ամերիկյան մեծ ընկճախտին (նա ծնվել է 1930 թ.), նրա ընտանիքը մշտապես տեղափոխվել է, գործնականում մշտական տուն չի ունեցել, իսկ երբ տղան 13 տարեկան է եղել, նրանցից հեռացել է հայրը: Հեքմենը եղել է չշփվող, բայց մեծ կրքով սիրել է կինոն և իր ամաչկոտությունը հաղթահարելու համար որոշել է դերասան դառնալ:
Բայց սկզբում Հեքմենը 4 տարի ծառայել է ծովային հետևակում: Ծառայության ընթացքում նա եղել է Ճապոնիայում և Չինաստանում, իսկ տարբեր մարդկանց հետ շփվելու փորձը նա հետո օգտագործել է իր դերասանական կերպարանափոխությունների համար:
Ծառայությունից հետո Հեքմենը տեղափոխվել է Նյու Յորք: Որպես վետերան նա կարող էր սպասել, որ պետությունը հոգար իր ուսման ծախսերը, բայց դերասանական կուրսերը պետական ծրագրում ընդգրկված չեն եղել: Հեքմենն ուսման համար փող չի ունեցել, ուստի ստիպված սովորել է գեղարվեստի դպրոցում, հետո՝ ռադիոտեխնիկայի դպրոցում, հետո՝ լրագրություն Իլինոյսի համալսարանում: Ամեն դեպքում, նա սկսել է դերասանական վարպետություն սովորել Կալիֆոռնիայում, որտեղ ծանոթացել է Դասթին Հոֆմանի հետ: 3 ամիս հետո նա ամեն ինչ թողել է, վերադարձել Նյու Յորք և շարունակել ուսումը արդեն Ջորջ Մորիսոնի մոտ:
Հեքմենը կինո է գնացել թատրոնից: Սկզբում խաղացել է լոնգայլենդյան թատրոններից մեկում, հետո տեղափոխվել է Բրոդվեյ: Նրա առաջին նշանակալի դերը կինոյում Կլայդի եղբոր դերն է «Բոննին և Կլայդը» ֆիլմում: Ֆիլմը հսկայական հաջողություն է ունեցել, իսկ Հեքմենը դարձել է երկրորդ պլանի իսկական արքա:
Ջին Հեքմենը նույն կերպ հեշտորեն խաղացել է և՛ թրիլլերում, և՛ կատակերգությունում, նա կարող էր լինել զինվորական, շերիֆ, ոստիկան, թափառական, սովորական ամերիկացի աշխատավոր:
