Կառավարության նիստում վարչապետ Հովիկ Աբրահամյանը հայտարարեց, որ աշխարհում տնտեսական պատերազմ է սկսված, և Հայաստանը պետք է պատրաստ լինի բոլոր սցենարներին:
Ձևավորվել է աշխատանքային խումբ, որը գլխավորում է Միջազգային տնտեսական ինտեգրման և բարեփոխումների նախարար Վաչե Գաբրիելյանը, իսկ աշխատանքներին մասնակցում են շահագրգիռ այլ պետական կառույցների ներկայացուցիչներ:
Վաչե Գաբրիելյանը նշեց, որ իրենք տնտեսական դիմադրողականությունը մեծացնելու համար տարբեր միջոցառումներ են նախատեսել: Ամենակարևոր քայլն այստեղ արտարժութային ներհոսքերի ապահովումն է:
«Այստեղ միջազգային շուկաներից փող բերելու հնարավորության մասին է խոսվում, մասնավորապես, այս պահին ՀՀ պարտատոմսերը շատ բարենպաստ տոկոս ունեն երկրորդային շուկայի շրջանառության մեջ: Առևտուրը 6 տոկոսի շրջանակներում է»,- հայտնեց Գաբրիելյանը՝ նկատելով, որ այս միջոցառումները կարևոր են ներդրողներ բերելու տեսանկյունից:
Ըստ նախարարի՝ աշխատակազմը քննարկել է նաև ԿԲ-ի կողմից մշակված՝ արտարժույթի փոխանակման կետերի մասին նոր հայեցակարգը, ՏՄՊՊՀ-ի կողմից գների հնարավոր փոփոխություններին արագ արձագանքելու խնդիրը, որպեսզի այս վիճակը չազդի դրսից ներգրավվող նոր միջոցների վրա: