Human Rights Watch իրավապաշտպան կազմակերպությունը կազմել է աշխարհում մարդու իրավունքների վերաբերյալ իր 25-րդ ամենամյա զեկույցը: Այն բաղկացած է 644 էջից, իր մեջ ներառում է 90 երկիր: Զեկույցի՝ Հայաստանի վերաբերյալ մասում նշվում է, որ Հայաստանում մարդու իրավունքների հետ կապված վիճակը հարթ չի եղել 2014թ. ընթացքում: Իշխանությունները շարունակում են միջամտել խաղաղ ցույցերին: Կալանավայրերում բռնությունը և վատ վերաբերմունքը շարունակում են խնդիր մնալ, քննություններն արդյունավետ չեն, անգամ երբ բաց են: Լրագրողները շարունակում են առերեսվել ճնշումների և բռնության: Չնայած պարտադիր զինվորական ծառաությունից դեպի այլընտրանքային ծառայության հարցում փոփոխությունները գովասանքի են արժանի, բանակում բռնությունները շարունակվում են: Սեռական կողմնորոշման և գենդերային ինքնության հետ կապված բռնությունները և խտրականությունը շարունակում են լուրջ խնդիր մնալ:
Զեկույցի «Խոսքի ազատություն» բաժնում կարդում ենք.
«Մեդիայի բազամազանությունը շարունակում է մնալ սահմանափակ: Մեդիա հասարակական կազմակերպությունները դատապարտում են օրենքի այն նախագիծը, որով մեդիան պատասխանատու է համարվում հանրային ֆորումներում, այդ թվում սոցցանցերում անանուն կամ չիդենտիֆիկացված օգտատերերի կողմից սուտ կամ վիրավորական մեկնաբանությունների համար:
Խոսքի ազատության պաշտպանության կոմիտեն հայտնել է, որ 2014թ. առաջին կեսին լրագրողները և մեդիա շուկան շարունակում են առերեսվել սպառնալիքի և կեղծ դատական գործընթացների, գրանցված է լրագրողների դեմ ֆիզիկական բռնության առնվազն 5 դեպք:
Օրինակ, փետրվարի 12-ին ընդդիմության ակտիվիստներին ձերբակալելիս ոստիկանությունը խլել է տեսախցիկը «Չորրորդ իշխանության» և iLur.am կայքի լրագրողներ, քույր և եղբայր Անի և Սարգիս Գևորգյաններից և կարճատև ժամանակով նրանց բերման ենթարկել: Բաժանմունքում ոստիկանությունը ջնջել է նրանց տեսախցիկների նյութերը, հարվածել Անի Գևորգյանին և վերցրել նրա հեռախոսը: Գևորգյանի բողոքի համաձայն՝ իշխանությունները քրեական գործ են հարուցել, որը սակայն փակվել է հունիսին՝ հանցանքի բացակայության պատճառով: Գևորգյանը բողոքարկել է վճիռը: ԵԱՀԿ մեդիայի ազատության ներկայացուցիչ Դունյա Միյատովիչը մտահոգություն է հայտնել միջադեպի կապակցությամբ:
Հունիսի 24-ին, երբ լրագրողները և մյուսները Երևանի ոստիկանական բաժանմունքի դիմաց սպասում էին այդ օրն ավելի վաղ ձերբակալված ակտիվիստի ազատ արձակմանը, ոստիկանությունը ցրել է ժողովրդին և հարձակվել որոշ լրագրողների վրա: Ոստիկանները ծեծել են Անի Գևորգյանին և CivilNet.TV-ի լրագրող Արփի Մախսուդյանին, կոտրել GALA TV-ի օպերատոր Փայլակ Ֆահրադյանի նոթբուքը: Ոստիկանությունը ձերբակալել է Սարգիս Գևորգյանին: Անի և Սարգիս Գևորգյանները բողոքարկել են, զեկույցը գրելու պահին քննությունը ընթացքի մեջ էր:
Հունիսի 26-ին Երևանի դատարանը պարտադրեց «Հրապարակ» օրաթերթին և Ilur.am լրատվական պորտալին բացահայտել իրենց աղբյուրները՝ որպես քրեական հետաքննության մաս՝ դրանում ներգրավելով բարձրաստիճան ոստիկանական պաշտոնյայի: ԵԱՀԿ մեդիայի ազատության հարցերով ներկայացուցիչը մտահոգություն է հայտնել այդ որոշման «զսպիչ ազդեցության » կապակցության՝ շեշտելով, որ լրագրողներն իրավունք ունեն գաղտնի պահել իրենց աղբյուրը՝ որպես հետաքննական լրագրության և խոսքի ազատության առանցքային բանալի:
