Եվրամիությունը, իր բոլոր թերություններով հանդերձ, շատ ուժեղ, ամուր ինտեգրացիոն միավորում է, և Ռուսաստանը պետք է նրանից լավագույն օրինակը վերցնի Ղազախստանի և Բելառուսի հետ Մաքսային միություն և Միասնական տնտեսական տարածք ստեղծելու համար: ՌԴ կառավարության մամլո ծառայության հաղորդմամբ` նման կարծիք է հայտնել ՌԴ վարչապետ Դմիտրի Մեդվեդևը:
Դ. Մեդվեդևը վստահ է, որ ԵՄ-ը կզարգանա: «Մեզ համար այն շատ կարևոր է որպես առևտրի կայուն գործընկեր: Մենք մեր արժութային պահուստները գլխավորապես եվրոյով ենք պահում: Բայց իհարկե, ԵՄ-ն պետք է զբաղվի իր թույլ կողմերով, ուշադրություն դարձնի մի շարք երկրների պարտքային բեռին, բարելավի նրանց տնտեսական ցուցանիշները, ստիպի նրանց զբաղվել այն ամենով, ինչ ընդունված է անվանել ֆիսկալային կոնսոլիդացիա, այսինքն` բյուջեով: Եվ, այսպես, հենց նրանք դա անեն, ԵՄ-ն դուրս կգա ավելի կայուն զարգացման ուղի»,- ասել է ՌԴ վարչապետը: