Արդեն մի քանի օր է՝ «Թոխմախի» գազալցակայանում 1 խ.մ գազը լիցքավորվում է 170 դրամով՝ նախկին 190 դրամի փոխարեն: Երևանում սա առաջին գազալցակայանն է, որը նախկին թանկացում-էժանացումից՝ 230 դրամից – 200 դրամ, հետո նման գին է առաջարկում: Երևանում 1 խ.մ գազի լիցքավորումը տարբեր գազալցակայաններում տատանվում է 190-200 դրամի, մինչդեռ Երևանից դուրս՝ միջինը 160-170 դրամի սահմաններում:
Մեր ունեցած տեղեկություններով՝ նշված գազալցակայանը գնացել է նման քայլի, քանի որ նոյեմբերից կեսերից սկսած այստեղ լիցավորվող ավտոմեքենաների շարժը դանդաղել է: Վարորդները նախընտրել են լիցքավորել մեքենաները Մասիսի ճանապարհի, Այնթափի և մոտակա շրջանների այլ գազալցակայաններում: Մյուս կողմից, մշտական հաճախորդներ համարվող տաքսի ծառայություններն ու երթուղայինները սպասարկող կազմակերպությունների մի մասը հրաժարվել են պայմանագրից և ընտրել քաղաքից դուրս համեմատաբար մատչելի լիցքավորման տարբերակը:
Ըստ նույն աղբյուրի՝ էժանացումից հետո հաճախորդների հոսքը սկսել է շատանալ, բայց դեռ մի շաբաթ առաջ, հատկապես երեկոյան 1-ից հետո 7-8 մեքենա է մինչև լուսաբաց լիցաքավորվել: Սա նշանակում է, որ իրավիճակն իսկապես մտահոգիչ է եղել, քանի որ այս գազալցակայանը Երևանում ամենախոշորներից է և փաստորեն նախընտրել է լիցքավորվող գազի գինն էժանացնել, քան մնալ առանց սպառողների:
Վարորդների շրջանում այս նորությունը հույս է առաջացրել, որ Երևանի մնացած լցակայաններն էլ այս օրինակով կէժանացնեն գազը: «Առաջին լրատվական»-ի հետ զրույցում «Իրազեկ և պաշտպանված սպառող» ՀԿ նախագահ Բաբկեն Պիպոյանն, անդրադառնալով թեմային, նշեց, որ դաշտում կարգավորումները չկան, պատկան մարմինները չեն զբաղվում գնի և որակի կարգավորման խնդիրներով:
«Թե ինչ գին է սահմանվել՝ դա կապ չունի, չկա ջերմաստիճանային, ճնշման նորմավորում: Մարդիկ գիտեն, որ գինը կապ չունի, այստեղ մոլորություն կա, եթե 5000 դրամ էին վճարում ու վարում, ասենք, 200 կմ, հիմա 4500 կվճարեն ու ավելի քիչ կվարեն. արդեն պարզ է դառնում, որ այս էժանացումը թույլ չի տալիս հասկանալ ճշգրիտ պատկերը»,- նկատեց Պիպոյանը:
Նրա խոսքերով՝ ոլորտում վերջին դրական փոփոխությունը բաշխիչ աշտարակներ են եղել, դրանից հետո առաջընթացին ուղղված այլ գործողություններ չեն կատարվել:
«Վարորդները շատ լավ գիտեն, որ մարզերում ավելի մատչելի և որակյալ գազ են լիցքավորում: Լավ կլինի, եթե ՏՄՊՊՀ-ը, Շուկայի վերահոկողության պետական տեսչությունը ուսումնասիրություններ անցկացնեն Երևանի շուկայում, որպեսզի նման դեպքերում պատկերը հստակ լինի, թե վերջնական գնային հաշվարկն ինչ գործոններով է ձևավորվում»,- հայտնեց սպառողների իրավունքների պաշտպանը:
Թե ինչքանով է հնարավոր, որ մնացած գազալցակայանները վերանայեն իրենց գները, Պիպոյանը հետևյալ պատասխանը տվեց. քանի դեռ դաշտում մոլորեցում է ըիրառվում, մարդիկ գների փոփոխությունը վիզուալ են տեսնում և ոչ թե առարկայական, դժվար է հստակ ասել՝ ինչ կլինի:
«Եթե պատկան մարմիններն իրենց գործն անեն այս ոլորտում, հաշված ժամերի ընթացքում հասկանալի կլինեն թե՛ գինը, թե՛ կարգավորման չափանիշները»,- հավելեց Պիպոյանը:
