Թուրքիայի քրեական օրենսգրքի 301-րդ հոդվածը, որը թեև մշտապես ուժի մեջ է եղել, սակայն վերջին շրջանում չէր կիրառվում, կրկին շրջանառության մեջ է դրվել. այս անգամ տխրահռչակ հոդվածի զոհն է դարձել հայտնի թուրք փաստաբան, Մարդու իրավունքների միության Ստամբուլի մասնաճյուղի նախկին նախագահ Էրեն Քեսքինը, ում դատարանը մեղավոր է ճանաչել 301-րդ հոդվածի հատկանիշներով և դատապարտել 10 ամսվա ազատազրկման։ Այս մասին հաղորդում է թուրքական «Ռադիկալ» պարբերականը։
Քեսքինը 2004 թվականին Մարդին նահանգի Քըզըլթեփե շրջանում տեղի ունեցած բախումների ժամանակ Ահմեթ Քայմազի և նրա 12-ամյա որդու՝ Ուղուր Քայմազի սպանությունից մեկ տարի անց հայտարարել էր, որ հենց Թուրքիան է մեղավոր այդ երեխայի սպանության համար, ինչպես նաև հայտարարել, որ Թուրքիայի պատմությունը կեղտոտ պատմություն է։ Այս խոսքերից հետո «Թուրքիայի Հանրապետությանը հրապարակավ նսեմացնելու» մեղադրանքով քրեական գործ էր հարուցվել 301-րդ հոդվածի հատկանիշներով, և 10 տարի անց դատարանը վերջապես կայացրեց իր վճիռը՝ Քեսքինին դատապարտելով 10 ամսվա ազատազրկման։
Նշենք, որ Մարդու իրավունքների միության Ստամբուլի մասնաճյուղը Հայոց ցեղասպանությունը ճանաչող կազմակերպություններից է, որի անդամները, այդ թվում՝ Էրեն Քեսքինը, ամեն տարվա ապրիլի 24-ին Ստամբուլում միջոցառումներ են կազմակերպում՝ նվիրված Հայոց ցեղասպանության զոհերի ոգեկոչմանը: Բացի այդ, Քեսքինը դատական մի շարք գործընթացներում պաշտպանել է Թուրքիայի՝ ազգությամբ հայ քաղաքացիների շահերը։
Ժամանակին Թուրքիայի ՔՕ 301-րդ հոդվածով մեղավոր է ճանաչվել նաև «Ակօս» շաբաթաթերթի նախկին խմբագրապետ Հրանտ Դինքը։ Մասնագետների մի մասը կարծում է, որ Դինքին 301-րդ հոդվածով դատապարտելը դարձավ նրա սպանության պատճառներից մեկը։
