Հունվարն անշարժ գույքի շուկայի համար պասիվ ամիս է, որպես կանոն, մինչև փետրվարի վերջ այստեղ աշխուժություն չի նկատվում: Անշարժ գույքի մասնագետները նշում են, որ այստեղ ևս առքուվաճառքի սեզոնայնություն կա: Մարդիկ բնակարան կամ մեքենա գնում են մինչև տոներ կամ գարնան սկզբին: «Առաջին լրատվական»-ի հետ զրույցում այս մասին հայտնեց «Նոր տուն ռիելթի» անշարժ գույքի և գնահատման գործակալության տնօրեն Վլադիմիր Հարությունյանը:
Նա տեղեկացրեց, որ հունվարին Երևանում դրամով վաճառվող բնակարանների գինը նվազել է մոտ 10 տոկոսով, դոլարով վաճառվողներինը՝ մինչև 20 տոկոս: «Եթե գնորդը ռեալ է, վաճառողը կամ բրոքերը (փոխհամաձայնեցնելով գինը սեփականատիրոջ հետ) գնում են էժանացման: Մեր գործակալության հունվարի վիճակագրությունը ցույց է տալիս, որ էժանացման տեմպը շարունակվելու է: 10-20 տոկոս տատանումը մոտիվացնում է գնորդներին և նաև վաճառողին կարճ ժամկետում վաճառքի գործարքը իրականացնելու համար»,- հայտնեց Հարությունյանը:
Նրա խոսքով՝ երկրորդ պատճառ էլ կա. վաճառողների մի մասը պարզապես ստիպված է լինում գին իջեցնել, քանի որ վարկային պարտավորություններ ունի, հակառակ դեպքում նա շուկայում ձևավորված գնով չի կարողանա իր գույքը վաճառել, և բանկը կառգրավի:
«Երբ տունն արդեն բանկի վերահսկողության ներքո է, պարզ է, որ շուկայական գնից բավականին ցածր է վաճառվելու, սակայն նմանատիպ գործարքները չեն կատարվում բաց և հանրային»,- հայտնեց մասնագետը՝ նկատելով, որ նման դեպքերում մարդիկ նախընտրում են իրենց տունը իրենք վաճառել, մի քիչ էլ շուկայականից ցածր գներով, քան բանկը:
Հարությունյանը նշեց, որ նոր տարվա առաջին ամսվա վիճակագրությունը ցույց է տալիս, որ մարդիկ այլևս չեն կարողանում արհեստական գին պահել, քանի որ այս պահին առաջարկվող բնակարանների գները մարդկանց ֆինանսական պահանջարկին համապատասխան չեն:
Անշարժ գույքի մասնագետ Սևակ Հովհաննիսյանն «Առաջին լրատվական»-ի հետ զրույցում հայտնեց, որ Երևանում գները մի փոքր էժանացել են՝ 35-50 հազար դոլար արժողությամբ բնակարանների դեպքում 2000-3000, երբեմն նաև մինչև 5000 դոլար էժանացում է նկատվում: Ինչ վերաբերում է առանձնատներին, վերջինս նկատեց, որ այստեղ գների տատանում չկա. «Երևանի փոքր և մեծ կենտրոնում, ինչպես նաև էլիտար թաղամասերում գները նույնն են, 5-10 տոկոսի սահմաններում էժանացել են առանձնատների գները Արեշում, Զեյթունում, Մալաթիայում, Չարբախում և ծայրամասային մի քանի թաղամասերում»:
Ուսումնասիրելով շուկան՝ Հովհաննիսյանը նկատեց, որ սեփական տուն գնել ցանկացողները, հատկապես եթե ունեն գումարային սահմանափակումներ, նախընտրում են բնակարան գնել Երևանի մերձակա գյուղերում. «Խարբերդ, Հաղթանակ, Այնթապ, Ձորաղբյուր, Թաիրով, Արգավանդ և այլ մոտ շրջաններում սեփական տների գինը կայուն է, քանի որ ձևավորված է կայուն պահանջարկ»:
Երևանում, ըստ մասնագետի, բնակարան գնել ցանկացողների համար ամենապահանջված համայնքներն են Մոնումենտը, Զեյթունը, Դավթաշենը, Նոր Նորքը, Ավանը, Մալաթիա-Սեբաստիան, քիչ պահանջարկ կա Էրեբունի, Չարբախ, Աջափնյակ համայնքների համար:
«Ընդհանուր պահանջարկի 80 տոկոսը բնակարանի գնման դեպքում 40-55 հազար դոլարի սահմաններում է, սեփական տների դեպքում՝ 50-90 հազարի: Կարծում եմ՝ փետրվարի վերջին այս թվերը մի քիչ կփոխվեն, քանի որ ներկա միտումները հուշում են, որ գների նվազում անպայման կլինի, ամեն ինչ կախված է փոխարժեքից»:
