2011թ.-ին գյուղատնտեսությունը Սերժ Սարգսյանի կողմից ճանաչվել է որպես գերակա ճյուղ, և այսօր իշխանական բոլոր կառույցները խոսում ու քննարկումներ են կազմակերպում գյուղատնտեսության մասին: Սակայն հետաքրքրականն այն է, որ գյուղատնտեսական ոլորտի առաջնահերթ ծրագրերի համար պետական բյուջեից հատկացվող միջոցները տարեցտարի կրճատվել են:
Այդ մասին այսօր ԱԺ գյուղատնտեսական և բնապահպանական մշտական հանձնաժողովի լսումների ժամանակ խոստովանեց հենց ինքը գյուղատնտեսության նախարար Սերգո Կարապետյանը և այդ հանգամանքը մտահոգիչ համարեց:
Նա տեղեկացրեց, որ բյուջետային ծրագրով 2008թ. հատկացվել է 8,1 մլրդ, 2009-ին` 7,9 մլրդ, իսկ 2011-ին ընդամենը 5,4 մլրդ, որից նախարարությանը մնացել է 2,5 մլրդ դրամ, որն էլ հիմնականում բավարարում է աշխատավարձերին և նախարարության ծախսերը հոգալուն:
Նման բյուջեով և բազմաթիվ խնդիրներ ու բացթողումներ ունեցող գյուղատնտեսության նախարարությամբ էլ իշխանությունները ցանկանում են բարեփոխել գյուղատնտեսական ոլորտը:
Գյուղնախարարը նաև խոսեց այդ բացթողումների մասին և ընդգծեց, որ կառավարությունն իր անարդյունավետ գործունեության արդյունքում սպառել է գյուղական բնակիչների վստահությունը: Նրա խոսքերով, իրենց վերջին այցելությունները մարզեր ցույց են տվել, որ իրենք այնտեղ չունեն ժողովրդի վստահության քվեն: Նա խիստ քննադատեց նաև նախարարության գործունեությունը. «2009-2010թթ. նախարարության բյուջետային ծախսերի 2,4 տոկոսն ուղղվել է խորհրդատվական ծառայություններին, սակայն 340 հազար տնտեսություններից միայն 45 հազարն են օգտվել այդ ծառայությունից»:
Արդյունավետ պայքար չի մղվել նաև կրծողների դեմ: Նախարարը նշեց, որ Հանրապետության ցանքատարածությունների գրեթե 50 տոկոսը չի օգտագործվում ըստ նշանակության, չհիմնավորված բարձր են մնում պարարտանյութերի գները: