«Հայկական ժամանակ»-ի ստացած հավաստի տեղեկությունների համաձայն «Կարֆուր» հիպերմարկետների ֆրանսիական ցանցի բարձրաստիճան ներկայացուցիչները արդեն տևական ժամանակ է, ինչ փորձում են հանդիպում ունենալ ՀՀ ամենաբարձր ղեկավարության հետ: Ինչը, սակայն, նրանց ոչ մի կերպ չի հաջողվում:
«Կարֆուրի» ներկայացուցիչներին մերոնք «ցրում են»՝ ասելով, որ նախագահական ընտրություններ են, և թե Սերժ Սարգսյանը, թե Տիգրան Սարգսյանը խիստ զբաղված են: Սակայն, «Կարֆուրի» ներկայացուցիչների հետ հանդիպումները հնարավորինս ձգձգելը պայմանավորված է նրանով, որ այստեղ չեն կարող առայժմ պատասխանել նրանց հարցերին: Իսկ հարցերը վերաբերում են այդ հսկա ցանցի՝ Երևանում բացվելիք հիպերմարկետի հետագա ճակատագրին: Ինչպես արդեն թերթը նշել էր, Երևանի «Դալմա Մոլ»-ի սեփականատիրոջ և «Կարֆուրի» միջև դեռ նախորդ տարի պայմանավորվածություն էր ձեռք բերվել՝ 10 հազար քառակուսի մետր տարածքի վրա 2012 թվականի նոյեմբերին բացել «Կարֆուր» հիպերմարկետ: Սակայն հետո պարզվել էր, որ ֆրանսիական այս ցանցը ինքն է իր համար ներկրում ապրանքը և ինքն է որոշում, թե ինչ գնով պետք է այն վաճառի: Հաշվարկները ցույց էին տալիս, որ «Կարֆուրի» գործունեության արդյունքում մեր օլիգարխներից շատերը պարզապես կսնանկանան:
Խնդիրն այն է, որ «Կարֆուրի» առաջարկած տեսականիում լայն սպառման ապրանքների մի զգալի մասը ավելի էժան կլինի, քան ներկայումս մեր սուպերմարկետներում վաճառվող նույնանուն ապրանքները, իսկ որակի առումով ընդհանրապես համեմատության եզրեր չկան: Բացի այդ, «Կարֆուրը» կդառնար ոչ միայն սննդամթերքի խոշորագույն ներկրողներից մեկը, այլև՝ կարող էր զբաղվել արտահանմամբ: Մասնավորապես, նա կարող էր արտահանել Հայաստանում արտադրվող մրգի մի որոշ մաս՝ այլ երկրներում գտնվող իր հիպերմարկետներում վաճառելու համար: Իսկ սրանով նա նույնպես, մեծ վտանգ է ներկայացնում մեր օլիգարխների համար: Հայտնի փաստ է, որ մասնավորապես ծիրանի արտահանման հիմնական մասը վերահսկվում է մեր մի քանի օլիգարխների ու բարձրաստիճան պաշտոնյաների կողմից:
Նշենք, որ «Կարֆուրում» բավական ժամանակ գլխի չեն ընկել, թե ինչու է տապալվել գործարքը: «Դալմա Մոլում» տեղ չստանալը, նրանք սկզբում ընկալել են, որպես տեխնիկական խնդիր և փորձեր են ձեռնարկել իրենց հիպերմարկետը բացել Երևանի խիտ բնակեցված արվարձաններից մեկում՝ Հարավ-արևմտյան թաղամասում, Ավանում կամ Նոր Նորքի զանգվածում: Միայն այն բանից հետո, երբ ամենուր հանդիպել են անանցանելի դժվարությունների, հասկացել են, որ գործ ունեն ՀՀ իշխանական վերնախավի ամենաբարձր օղակներում կայացված քաղաքական որոշման հետ: Ու միայն դրանից հետո որոշել են, որ հարցը պետք է քննարկվի հենց նույն՝ ՀՀ ամենաբարձր իշխանության հետ:
Թե ինչպես կզարգանան իրադարձությունները, ցույց կտա ժամանակը: Պետք է նշել, սակայն, որ ՀՀ իշխանությունում ոչ բոլորն են, որ դեմ են «Կարֆուրի» հիպերմարկետի բացմանը Հայաստանում: Այնպես որ, «Կարֆուրի» հարցը շուտով, ամենայն հավանականությամբ, նախագահական ընտրություններից հետո կդառնա ներիշխանական լուրջ քննարկումների առարկա: Բացի այդ, բացառված չէ, որ ՀՀ իշխանությունների վրա ճնշումներ բանեցվեն դրսից: «Կարֆուրի» մուտքը Հայաստան, առանց չափազանցության, կարող է լուրջ վերադասավորումներ առաջացնել օլիգարխիկ համակարգում: