Արևմուտքն ուզում էր Հայաստանում իրավիճակ փոխել ընտրությունների արդյունքում, սակայն երեք հայտնի ուժերի չմասնակցության պարագայում դա հնարավոր չէ, ինչի կապակցությամբ այժմ նեղված են: Այս մասին «Արմնյուզ» հեռուստաընկերության «Բանաձև» հաղորդման եթերում ասել է «Ազգային միաբանություն» կուսակցության նախագահ, ԱԺ ՀՀԿ խմբակցության անդամ Արտաշես Գեղամյանը և հավելել, որ իրենց այդ պահվածքով վիրավորում են ՀՀ ակունքներում կանգնած հզոր գործիչների` Պարույր Հայրիկյանին, Հրանտ Բագրատյանին, Րաֆֆի Հովհաննիսյանին: Ընտրությունները, ըստ նրա, լավ էլ մրցակցային են:
Խոսելով ՀԱԿ-ի` Հրանտ Բագրատյանին չպաշտպանելու մասին, Գեղամյանը տարակուսանք է հայտնել, քանի որ նույն «100 քայլ» ծրագիրը, որ ներկայացնում է Հրանտ Բագրատյանը, ժամանակին ՀԱԿ ծրագիրն էր: «ՀԱԿ-ը չի պաշտպանում, որպեսզի հետո ասի, թե ընտրությունները մրցակցային չէին, արդար չէին, լեգիտիմ չէին»,- ասել է Արտաշես Գեղամյանը:
Լևոն Տեր-Պետրոսյանի չառաջադրվելու համար տարիքը պատճառ բերելը Արտաշես Գեղամյանը ծիծաղելի է համարել և հիշել է, որ Չեխիայի նախագահական ընտրություններին մասնակցում է 75-ամյա թեկնածու: «Դրսում սա հաղթաթուղթ է, քանի որ դա փորձառություն է բերում: Ուրիշ երկրներում տարիքը շնորհք է բերում, մեզ մոտ` հակառակը»:
Արտաշես Գեղամյանը չի մոռացել շնորհավորել Հովիկ Աբրահամյանի ծննդյան օրը և կոչ է արել թեկնածուներին` ևս շնորհավորել` փոխանակ բանավիճելու: