Թուրքիայում՝ Սիրիայի հետ սահմանամերձ գոտում Patriot զենիթահրթիռային համակարգերի տեղակայումը կարող է սադրանքների հանգեցնել: Ինչպես հաղորդում է Itar-Tass-ը, նման կարծիք է հայտնել ՌԴ փոխարտգործնախարար Գենադի Գատիլովը:
«Եթե թուրքիան համարում է, որ դա հարկավոր է իր անվտանգության համար, ապա դա նրա ազգային որոշումն է: Իսկ իրականում, ինչպես նշել են նաև մասնագետները, նման համակարգերի կարիք չկա»,- ասել է բարձրաստիճան դիվանագետը:
«Այդ պատճառով, բնական է, որ այդ նոր հանգամանքի ավելացումը չի նպաստում իրավիճակի կարգավորմանը: Ընդհակառակը, այս քայլն ուղղված է հակամարտության սրմանը և տարածաշրջանում լարվածության ավելացմանը: Կարող են նաև սադրանքներ լինել»,- համարում է Գատիլովը:
Սադրանքները, նախարարի խոսքերով, կարող են առաջանալ նաև քիմիական զենքի հետ կապված, երբ ստեղծվի այնպիսի իրավիճակ, որ հետագայում հնարավոր կլինի «մեղադրել սիրիական կառավարությանը»:
Ինչպես հաղորդվել էր ավելի վաղ, առաջին զենիթահրթիռային համակարգերը Թուրքիայում կտեղակայվեն այս շաբաթվա վերջին: