Կորեական Samsung Electronics-ը չի հրաժարվում կանադական սմարթֆոն արտադրող BlackBerry-ն ամբողջովին գնելու կամ դրա բաժնետոմսերի խոշոր փաթեթ ձեռք բերելու մտադրությունից: Այս մասին հայտնում է կանադական Financial Post թերթը:
Հիշեցնենք՝ ավելի վաղ երկու ընկերությունները հերքել էին Reuters-ի հրապարակած տեղեկությունը BlackBerry-ն 7,5 մլրդ դոլարով գնելու Samsung-ի ծրագրերի մասին:
Պետք է նշել, որ Financial Post-ի հոդվածը հիմնված է ոչ թե անանուն աղբյուրների, այլ պարբերականի տրամադրության տակ հայտնված փաստթաթղթի վրա: Խոսքը Samsung-ի համար նյույորքյան Evercore Partners ներդրումային բանկի կազմած փաստաթղթի մասին է:
Փաստաթուղթը պատրաստվել է 2014 թ. վերջին եռամսյակում: Սակայն թերթի աղբյուրի պնդմամբ՝ Samsung-ը մինչև հիմա պատրաստ է գնել կանադական ընկերությունը, եթե հաջողվի պայմանավորվել արդարացի գնի շուրջ: BlackBerry-ն և Samsung-ը հրաժարվել են մեկնաբանություն անել:
