ԱՄՆ-ը պաշտպանում է Ուկրաինայի պետական ինքնիշխանությունն ու անկախությունը: Այս մասին ասվում է Կոնգրեսին հղված «Երկրի վիճակի մասին» ամենամյա ուղերձի տեքստում, որով Օբաման հանդես է եկել Կապիտոլիումում՝ փոխանցում է TASS գործակալությունը:
Օբամայի խոսքով՝ ԱՄՆ-ը ցուցադրում է ամերիկյան ուժն ու դիվանագիտությունը:
«Մենք պաշտպանում ենք սկզբունքը, որ ավելի խոշոր երկրները չեն կարող վախեցնել չափերով փոքրերին: Դա անում ենք ռուսական ագրեսիային դիմակայելով, Ուկրաինայի ժողովրդավարությանն աջակցելով և ՆԱՏՕ-ի դաշնակիցներին քաջալերելով»,- ասել է Օբաման:
Նրա խոսքով՝ անցած տարի, երբ ԱՄՆ-ն զբաղված էր իր դաշնակիցների հետ պատժամիջոցների սահմանման ծանր աշխատանքով, ոմանք կարծիք էին հայտնում, որ Մոսկվայի գործողություններն իրենցից ներկայացնում են ռազմավարության և ուժի վարպետորեն ցուցադրություն: «Ռուսաստանը մեկուսացած է, իսկ նրա տնտեսությունը գտնվում է տխուր վիճակում»,- ասել է Սպիտակ տան ղեկավարը:
Օբաման նշել է, որ ԱՄՆ-ը դրան հասել է ոչ թե աղմկալի խոսքերի, այլ համառ, անշեղ վճռականության միջոցով:
