Հունվարի 23-ին ՀՀ ԱԳ նախարարի տեղակալ, Զոհրաբ Մնացականյանը Լատվիայի Հանրապետություն աշխատանքային այցի շրջանակներում հանդիպեց ԱԳ նախարար Էդգարս Րինկևիչսի հետ: ՀՀ ԱԳՆ մամլո գրասենյակից «Առաջին լրատվական»-ին հայտնում են, որ կայացած զրույցի ընթացքում կողմերը գոհունակությամբ արձանագրել են, որ երկկողմ քաղաքական երկխոսությունը ստացել է պարբերական, առարկայական և արդյունավետ բնույթ: Կողմերը մտքեր են փոխանակել փոխադարձ հետաքրքրություն ներկայացնող մի շարք հարցերի շուրջ, հատուկ անդրադարձ կատարվեց Հայաստան-ԵՄ հարաբերություններին: Զոհրաբ Մնացականյանը նախարարին ներկայացրել է ՀՀ-ԵՄ համագործակցության ձեռքբերումներն ու իրականացվելիք քայլերը մինչև Վիլնյուսում նոյեմբերին կայանալիք Արևելյան գործընկերության երկրների գագաթաժողովը: Կարևորվել է 2015թ. առաջին կիսամյակում Լատվիայի ԵՄ նախագահության շրջանակներում երկկողմ համագործակցության խորացումը:
Նախարարի հետ հանդիպմանը հաջորդել են քաղաքական խորհրդակցությունները Լատվիայի ԱԳՆ քաղաքական հարցերով տնօրեն Անդրեյս Պիլդեգովիչսի հետ: Հանդիպման ընթացքում համաձայնեցվել է 2013թ. երկկողմ համագործակցության օրակարգը, ինչպես նաև ծավալուն քննարկումներ են կայացել բազմակողմ, տարածաշրջանային, Լեռնային Ղարաբաղի հակամարտության առնչվող խնդիրներին:
Այցի շրջանակներում քննարկումներ են անցկացվել Լատվիայի Համալսարանի պրոֆեսորա-դասախոսական անձնակազմի ներկայացուցիչների հետ` Արևելյան գործընկերություն համագործակցության շրջանակներում Հայաստանին վերաբերող հարցերի, ԵՄ-Լատվիա-Հայաստան փոխգործակցության վերաբերյալ: Լատվիական կողմը ներկայացրել է Լատվիայի և Հայաստանի միջև կրթության և գիտության բնագավառում համագործակցության վերաբերյալ ուշագրավ առաջարկներ:
Նույն օրը Զոհրաբ Մնացականյանը հանդիպում է ունեցել Լատվիայի Սաեյմայի (խորհրդարան) փոխխոսնակ Անդրեյս Կլեմենտյևսի հետ, որի ընթացքում արծարծվել է խորհրդարանական համագործակցության ժամանակացույցը:
Լատվիայի Սաեյմայում փոխնախարար Մնացականյանը հանդիպումներ է ունեցել նաև Արտաքին հարաբերությունների հանձնաժողովի նախագահ Օյարս Կալնինշի հետ, ինչպես նաև Լատվիա-Հայաստան բարեկամության պատգամավորական խմբի նախագահ Իգոր Կլեմենտյևի հետ:
