Կիևի Պեչերսկու շրջանային դատարանն Ուկրաինայի նախկին նախագահ Վիկտոր Յանուկովիչի ձերբակալության մասին վճիռ է կայացրել: Այս մասին հաղորդվում է Ուկրաինայի գլխավոր դատախազության կայքում:
Գերատեսչության հաղորդագրության մեջ ասվում է, որ Յանուկովիչի ձերբակալության վճիռը «գլխավոր դատախազության հետաքննիչներին հնարավորություն կտա պահանջել Ռուսաստանի Դաշնության տարածքից Յանուկովիչի արտահանձնում»:
Մեկ շաբաթ առաջ Ինտերպոլը Վիկտոր Յանուկովիչի նկատմամբ հետախուզում է հայտարարել: Այն ժամանակ Ռուսաստանի գլխավոր դատախազ Յուրի Չայկան հայտարարեց, որ Ռուսաստանի գլխավոր դատախազությունն ուկարինացի գործընկերներից Յանուկովիչին և հարևան պետության այլ քաղաքական գործիչներին արտահանձնելու հայտ չի ստացել:
Իսկ Ուկրաինայի ՆԳՆ ղեկավար Արսեն Ավակովը ռուսական իշխանություններին մեղադրեց ստելու համար: Նրա խոսքով՝ ռուսական իշխանություններն անտեսում են 24 մարդու հետախուզման մասին Ուկրաինայի հայտերը, որոնք ենթադրաբար գտնվում են Ռուսաստանի տարածքում:
