Իսրայելցիների և պաղեստինցիների միջև պետք է ուղիղ բանակցություններ անցկացվեն, ԱՄՆ վարչակազմը հետագայում նույնպես կպնդի դա,- հայտարարել է Սպիտակ տան պաշտոնական ներկայացուցիչ Ջեյ Քարնին:
Նա ընդգծել է, որ ուղիղ բանակցությունների անցկացումը կբերի երկու անկախ պետությունների ստեղծման, թույլ կտա պաղեստինցիներին ինքնիշխանություն ձեռք բերել, իսկ իսրայելցիներին՝ անվտանգություն ապահովել: Այս մասին հայտնում է ITAR-TASS-ը:
Քարնին ողջունել է իսրայելցի ժողովրդին խորհրդարանական ընտրությունների անցկացման առնչությամբ: «Կարծում եմ՝ միանգամայն հավանական է, որ նախագահ Բարաք Օբաման զանգահարի վարչապետ Բենյամին Նեթանյահուին»,- ասել է նա:
Դրա հետ միասին, Քարնին հերքել է ենթադրությունները ԱՄՆ-ի և Իսրայելի միջև հարաբերությունների լարված լինելու մասին:
«Ոչ մի առաջնորդ այնքան չի շփվել նախագահ Օբամայի հետ, որքան վարչապետ Նեթանյահուն: Մեր հարաբերություններն ամուր են մնում, դրանք մեզ թույլ են տալիս անցկացնել բաց և ազատ քննարկումներ, և դա լավ է ամերիկա-իսրայելական համագործակցության համար»,- ասել է Սպիտակ տան ներկայացուցիչը: Նա նաև հաստատել է ԱՄՆ-ի հակվածությունը Իսրայելի անվտանգության ապահովման գաղափարին:
