Հայ ազգային կոնգրեսի համակարգող Լևոն Զուրաբյանն այսօր «Ժառանգություն» խմբակցության ղեկավար Ստեփան Սաֆարյանին համեմատեց բարոն Մյունհաուզենի հետ՝ ասելով, թե նա սուտ է խոսում:
Բանն այն է, որ Սաֆարյանը Ֆեյսբուք սոցիալական ցանցում հայտարարել էր, թե 2008 թվականի մարտի 1-ի առավոտյան ինքը հանդիպել է Լևոն Տեր-Պետրոսյանին վերջինիս տանը ու տեղեկացրել Ֆրանսիայի դեսպանատան մոտ հավաքվող ժողովրդի մասին, Տեր-Պետրոսյանն իրեն պատասխանել է, որ «դա իր ժողովուրդը չէ»:
Զուրաբյանը փաստեց, որ նման հանդիպում չի եղել, որ այդ փաստն արդեն իսկ հերքվել է: «Ստեփան Սաֆարյանը նմանվում է բարոն Մյունհաուզենին: Նույն Սաֆարյանը նաև տեղեկություններ է հայտնել այն մասին, որ ինձ տեսել է Լևոն Տեր-Պետրոսյանի տանը: Հավատացե՛ք, բարոն Մյունհաուզենի հետ հավասարվում է, որովհետև ինձ չէր կարող տեսնել, ես շատ ուշ եմ եղել Տեր-Պետրոսյանի տանը: Ով հավատում է Մյունհաուզենին՝ թող հավատա»,- ասաց նա:
Լևոն Զուրաբյանը պատասխանեց նաև «Սարդարապատ» շարժման նախաձեռնող խմբի անդամ Ժիրայր Սեֆիլյանի հայտարարությանը, թե Կոնգրեսը պետք է փոխի «Լևոն նախագահ» կարգախոսը՝ նախազգուշացնելով, որ այլապես Կոնգրեսը կմնա լուսանցքում:
«Կարծում եմ, որ դեռ շատ վաղ է խոսել լուսանցքում հայտնվելու մասին, նման որևէ հեռանկար ես անձամբ չեմ տեսնում»,- ասաց Զուրաբյանը՝ հավելելով, որ շարժումը որևէ կարգախոս չի մոգոնում ու փաթաթում ժողովրդի վզին:
