«Հացադուլի իմաստն այն է, որ փետրվարի 7-8-ը այն կարևոր 24 ժամն է, որ թեկնածուները կարող են հանել թեկնածությունը, որպեսզի չհայտնվեն Սերժ Սարգսյանի հետ նույն ցուցակում: Հացադուլն էլ սիմվոլիկ նշան է` ուղղված նախագահի թեկնածուներին»,- «Հ2» հեռուստաընկերության «Խոսքի իրավունք» հաղորդման եթերում, անդրադառնալով նախագահի թեկնածությունը վայր դնելու և հացադուլ հայտարարելու իր որոշմանը, ասել է «Ազգային համաձայնություն» կուսակցության առաջնորդ Արամ Հարությունյանը:
Նրա խոսքերով՝ թեկնածուները պարտավոր են հետևել թեկնածությունը խմբակային վայր դնելու իր կոչին. «Ինչի՞ պետք է հետևեն այդ կոչին. որովհետև վստահ եմ, որ նրանք այդքան էլ ռոմանտիկ չեն: Ես չեմ կարծում, որ 5 տոկոս ձայն հավաքած մարդը, այն էլ` դաշինքով, կարող է հավաքել 50 տոկոսից ավելի ձայն, կամ Հրանտ Բագրատյանը, որ երբեք անկախ չի եղել: Մարդ, որը հայտնվեց պառլամենտում շնորհիվ Լևոն Տեր-Պետրոսյանի, բարոյական իրավունք չուներ առաջադրվելու: Պետք է հասկանան, որ դրանով խաչ են քաշում իրենց քաղաքական կյանքին: Այն մարդիկ, որ կմնան ցանկում, կստեղծեն արհեստական ֆոն»:
Արամ Հարությունյանի ողջ ասելիքն այս անգամ ևս ուղղված է եղել նախագահի մեկ այլ թեկնածու` Րաֆֆի Հովհաննիսյանի դեմ: «Րաֆֆի Հովհաննիսյանը ձեռքով բարևելով` վերջին հանգրվանը կլինի Սերժ Սարգսյանը, քանի որ ասել է` արդար ընտրությունների դեպքում մենք կշնորհավորենք Սերժ Սարգսյանին: Իսկ Սերժ Սարգսյանը արդար ընտրություն չի անի»,- ասել է Արամ Հարությունյանը՝ իրեն համարելով միակ ըդդիմադիր թեկնածուն: Նա նշել է, որ իշխանությունները ցանկանում են ֆոն ստեղծել, և ինքը. տեղյակ է անգամ ընտրությունների արդյունքներից. «Սերժ Սարգսյանը կհավաքի 60-ից ոչ ավել տոկոս, Րաֆֆի Հովհաննիսյանը` 25-ի կարգի, Բագրատյանի ու Հայրիկյանի միջև կռիվ կգնա, բայց մեծահոգություն կանեն, եթե Հայրիկյանը լինի երրորդ տեղում, և կստացվի, թե ընդդիմությունը ձայն տվեց Րաֆֆի Հովհաննիսյանին»:
Խոսելով Պարույր Հայրիկյանի մասին` Արամ Հարությունյանն ասել է. «Հայրիկյանը, կեղծելով 99 թ. ԱԻՄ ընտրությունները, ոչնչացրեց ԱԻՄ-ը: Ես շատ բան եմ սովորել նրանից, բայց ինչպես շատ է պատահում՝ աշակերտը գերազանցում է ուսուցչին»:
