Փարիզը բացասական է արձագանքել Մեծ Բրիտանիայի վարչապետ Դևիդ Քեմերոնի այն ելույթին, որում նա խոստացել է 2015 թ. խորհրդարանական ընտրությունների ժամանակ հաղթանակ տանելու դեպքում Եվրամիությանն անդամակցության հարցով երկրում հանրաքվե անցկացնել:
Ֆրանսիայի ԱԳ նախարար Լորան Ֆաբիուսը հայտարարել է, որ ԵՄ-ին չպետք է որպես ռեստորանի վերաբերվել, որտեղ կարելի է ճաշատեսակների ընտրություն կատարել ըստ ճաշացանկի: «Ես մի օրինակ կբերեմ, որը մեր բրիտանացի ընկերները կհասկանան: Պատկերացրեք, թե Եվրոպան ֆուտբոլային ինչ-որ ակումբ է: Եվ դառնալով նրա անդամ՝ չպետք է հայտարարել՝ եկեք ռեկբի խաղանք»,- այսպես է արտահայտել իր տեսակետը ֆրանսիացի նախարարը:
Նմանատիպ վերաբերմունք է արտահայտել նաև Բեռլինը: Գերմանիայի ԱԳ նախարար Գիդո Վեսթերվելլը հայտարարել է, որ Գերմանիան ցանկանում է, որպեսզի Մեծ Բրիտանիան մնա Եվրամիության ակտիվ անդամ, սակայն Լոնդոնը չի կարող հույսը դնել նրա վրա, որ իրեն կթույլատրվի կամայականորեն ընտրել ԵՄ անդամակցության այն ուղղությունները, որոնք իրեն են հարմար: Նա նշել է, որ ոչ ոք կոչ չի անում բոլոր հարցերը լուծել Բրյուսելում, և որ կառույցի ղեկավարումը լինի կենտրոնացված, սակայն «բլիթից չամիչ հանելու փորձն» այստեղ տեղին չէ:Եվրոպային ինտեգրում է հարկավոր:
Բրիտանիայի վարչապետը նշել է 5 սկզբունք, որոնք ըստ նրա պետք է որդեգրվեն ԵՄ-ի մոդեռնիզացման և վերակառուցման համար: Դրանք հիմնականում մրցունակությունը, ճկունությունը, իշխանության կենտրոնացման սահմանափակումը, ժողովրդավարական հսկողությունն ու արդարությունն են:
Քեմերոնը քննադատել է ԵՄ բյուրոկրատացումը և կառույցի ղեկավարման կենտրոնացման ձգտումը: Նա հայտարարել է, որ ԵՄ ժողովրդավարական լեգիտիմության և պատասխանատվության իրական աղբյուրը եղել և մնում են ազգային ժողովները:
Նա գտնում է, որ Բրիտանիայում համընդհանուր եվրոպական արժեքների նկատմամբ հիասթափության աստիճանը շատ մեծ է: Նա նաև հայտարարել է, որ Լոնդոնը չի կիսում ԵՄ-ի նպատակները առավել սերտ քաղաքական և տնտեսական միություն ստեղծելու հարցում: Բացի դա, Բրիտանիան ոչ մի պարագայում չի միանա եվրոգոտուն:
Եվ վերջապես, վարչապետը խոստացել է 2015 թ. խորհրդարանական ընտրությունների ժամանակ հաղթանակի դեպքում հանրաքվե անցկացնել ԵՄ կազմից Բրիտանիայի դուրս գալու մասին:
