Անցած շաբաթ կրկին տեղեկություններ ստացվեցին Ստեփանակերտի օդանավակայանի մասին: Ղարաբաղից ստացված լուրերը վերաբերում էին Երևան-Ստեփանակերտ առաջին կոմերցիոն թռիչքին, որը կարող է իրականացվել առաջիկա օրերին, գրում է BSR-russia.com առցանց պարբերականը՝ հավելելով, որ նման կանխատեսում ի հայտ է գալիս 4-րդ անգամ:
Ի պատասխան՝ Ադրբեջանի կառավարությունը երկրի ռազմաօդային ուժերին հրամայել է կրակ արձակել իր օդային տարածք ապօրինի մտնող քաղաքացիական օդանավի ուղղությամբ:
Հայաստանի պաշտպանության նախարար Սեյրան Օհանյանն էլ իր հերթին հայտարարել էր, որ ՀՀ Հակաօդային պաշտպանությունը կապահովի Երևանից Ստեփանակերտ թռչող քաղաքացիական օդանավի անվտանգությունը:
Ադրբեջանը չի փոխում Ղարաբաղը մեկուսացնելու իր քաղաքականությունը, և նման թռիչքների համար անհրաժեշտ են ռազմակա՛ն, ոչ թե քաղաքական երաշխիքներ, գրում է պարբերականը:
Փորձագետների կարծիքով՝ նման երաշխիք կարող է լինել Ղարաբաղում մեկ կամ մի քանի պետությունների ռազմական ներկայությունը: Որոշ փորձագետներ չեն բացառում, որ հայ-ռուսական նոր ռազմա-տեխնիկական համաձայնագիրը ներառում է Ղարաբաղում նոր հզոր հրթիռային համակարգերի տեղակայում և Ռուսաստանի կողմից անվտանգության հստակ երաշխիքներ:
Պարբերականը նշում է, որ Ռուսաստանի իշխանությունները երբեք էլ չեն թաքցրել Ղարաբաղ խաղաղապահներ ուղարկելու իրենց ցանկությունը:
Անցած տարի ՀԱՊԿ-ը խաղաղապահ առաքելությունների անցկացման թույլտվություն ստացավ ՄԱԿ-ից: Չի բացառվում, որ առաջին առաքելությունը կիրականացվի Ստեփանակերտի օդանավակայանում:
Փորձագետները չեն բացառում, որ արևմտյան երկրներն ու Ռուսաստանը կարող են արդեն համաձայնագիր ունենալ Ղարաբաղի մայրաքաղաքի օդանավակայանը համատեղ օգտագործելու վերաբերյալ: Նրանք արդեն համատեղ շահագործում են Ուլյանովսկի ռուսական օդանավակայանը՝ Աֆղանստանում օպերացիաների համար:
Ռազմական փորձագետները պարզաբանում են, որ Գյումրիում ռուսական ռազմաբազայի դիրքերի ամրապնդումը կապված է աշխարհաքաղաքական իրավիճակում հնարավոր կտրուկ փոփոխության հետ, ինչը սպառնալիք է Ռուսաստանի և նրա դաշնակիցների համար: Այդ սցենարները կապված են Լեռնային Ղարաբաղի համար Հայաստանի դեմ Ադրբեջանի հնարավոր դրսևորումներով, ինչպես նաև Իրանի դեմ Իսրայելի հնարավոր ռազմական գործողություններով:
