Ապրիլի 3-ին Մոսկվայի Կրեմլի համագումարների պալատում տեղի ունեցավ «Տաշիր-2011» մրցանակաբաշխության հանդիսությունը, որ ամեն տարի կազմակերպում է «Տաշիր գրուպի» սեփականատեր Սամվել Կարապետյանը, ով ՌԴ ամենահարուստ հայերից մեկն է: «Տաշիր» մրցանակաբաշխության ընթացքում բնակարաններ ստացան մի շարք հայ «աստղեր»:
«Առաջին լրատվականը» Սոցիալ-դեմոկրատ հնչակյան կուսակցության ատենապետ Լյուդմիլա Սարգսյանին խնդրեց գնահատել Սերժ Սարգսյանի աշխատակազմի ղեկավար Կարեն Կարապետյանի եղբայր Սամվել Կարապետյանի նշյալ շռայլ նվիրատվությունների փաստը:
«Ես հայրենասեր եմ, բայց երբևիցե չէի կարող ցույց տալ, որ եթե ունենայի այդ հնարավորությունները` այդքան միջոցներ ծախսել անճաշակ երգիչներին ու երգերին` բնակարան նվիրելու ուղղությամբ, երբ ամբողջ ժողովուրդը սոված է, համատարած աղքատություն է տիրում Հայաստանում: Մինչդեռ այդ «նվերները» ստանում էին մարդիկ, ովքեր ամեն ինչով ապահովված են: Նույնիսկ անհարմար էի զգում, որ այդ անճաշակությունը, բացառությամբ մի քանի երգերի, կարելի է ցուցադրել աշխարհի բազմաթիվ երկրներում և դեռ մտածել, որ դրանով կարելի է պրոպագանդել հայ երաժշտությունը: Ի վերջո, այդքան անտուն մարդկանց , թափառաշրջիկների, սոցիալապես անապահով հատվածի բանակը, որ մենք ունենք Հայաստանում, կարծում եմ` ավելի ազգանվեր գործ կլիներ, եթե Հյուսիսային պողոտայից տրամադրված բնակարաններից մի քանիսը վաճառվեին, և այդ մարդկանց Երևանի ծայրամասերում տասնյակ բնակարաններ կարելի էր նվիրել: Դա ես կհամարեի ազգանվեր գործունեություն: Ես նույնիսկ վիրավորված եմ, որ կարելի է այդ աստիճան կույր լինել և չհասկանալ, որ դրանով վարկաբեկում են ոչ միայն Հայաստանը, այլ նաև իրենք իրենց նախևառաջ»,- նշեց Լյուդմիլա Սարգսյանը:
