Զավեշտալի դեպք է տեղի ունեցել ամերիկյան Conde Nast ընկերության հետ, որը, ստանալով անծանոթից ընդամենը մեկ հաղորդագրություն, 8 մլն դոլար է փոխանցել նրա հաշվին:
Ինչպես հաղորդում է Forbes ամսագիրը, Conde Nast-ն այդ գումարը փոխանցել է այն ժամանակ, երբ ստացված հաղորդագրության մեջ նշված է եղել, որ այն Conde Nast-ի հետ համագործակցող հրատարակչությունից է, որին անհրաժեշտ են գումարները` Conde Nast-ի պատվերը կատարելու համար: Դեպքը տեղի է ունեցել նոյեմբեր ամսին: Քանի որ այդ հրատարակչության անունը Quad/Graphics է, Conde Nast-ում չեն նկատել, որ նամակ ուղարկողի անունը եղել է Quad Graph:
Գումարների կորուստը հաջողվել է հայտնաբերել բավական ուշ, երբ իրական հրատարակչությունը խնդրել է Conde Nast-ին կատարված աշխատանքի համար գումարը փոխանցել: Գումարը հաջողվել էր հետ վերադարձնել, քանի որ այն նստել էր Տեխասի բանկերից մեկում:
Խաբեբայության այս ձևը շատ տարածված է աշխարհում, և Conde Nast-ի բախտը բերել է այն առումով, որ եթե այդ գումարը փոխանցվեր աֆրիկյան որևէ բանկի, ապա դա դժվար կլիներ վերադարձնել:
