Երեք քուրդ ակտիվիստուհիների սպանության կասկածանքով Փարիզում հունվարի 21-ին մեղադրանք է առաջադրվել: Այս մասին հաղորդում է France-Presse-ը: Մեղադրանքն առաջադրվել է սպանված կանացից մեկի անձնական վարորդի դեմ:
Քննության տվյալներով՝ 30-ամյա Օմեր Գյունեյը էթնիկ քուրդ է: Նա ծնվել է Թուրքիայում, բնակվել Փարիզի Կուրնև արվարձանում: Վերջին երկու տարիներին նա եղել է Քրդստանի աշխատավորական կուսակցության անդամ: Տղամարդը եղել է ակտիվիստուհիներից մեկի մտերիմը և հաճախ հանդես եկել նրա վարորդի դերում:
Տղամարդու դեմ առաջադրվել է սպանության, ինչպես նաև սպանության իրականացման նպատակով դավադրության մեղադրանք:
Օմեր Գյունեյին ձերբակալել են Փարիզում հունվարի17-ին՝ ևս մեկ կասկածյալի հետ: Վերջինիս կարճ ժամանակ անց, առանց մեղադրանքների առաջադրման, ազատ են արձակել:
Հիշեցնենք, որ քուրդ կանանց սպանությունը Ֆրանսիայի մայրաքաղաքում տեղի էր ունեցել հունվարի 9-ին: Նրանց դիերը հայտնաբերվել էին հաջորդ օրը՝ Փարիզի Քրդական ինստիտուտի շենքում:
