McDonald’s արագ սննդի ռեստորանների ցանցի ղեկավարությունը համաձայնել է Դետրոյթի մուսուլմանական համայնքին վճարել 700 հազար դոլարի տուգանք,- հաղորդում է Associated Press-ը:
McDonald’s կորպորացիային մեղադրել են այն բանում, որ նրա գովազդային հայտարարություններում առկա է սուտ տեղեկատվություն այն մասին, որ մթերքներն իբր թե պատրաստված են մուսուլմանական կանոնների համաձայն:
2011 թ. սեպտեմբերին Միչիգան նահանգի Դիրբորն-Հայթս քաղաքի բնակիչ Ահմեդ Ահմեդը հայց է ներկայացրել ընդդեմ կորպորացիայի: Հայցվորի խոսքերով՝ McDonald’s-ի ռեստորաններից մեկում ինքը գնել է հավի մսով համբուգրեր, իսկ ավելի ուշ պարզել է, որ այն հալալ չէ:
Ահմեդի փաստաբանի խոսքերով՝ ԱՄՆ-ում McDonald’s-ի միայն երկու մասնաճյուղում են վաճառում հալալ մթերք, սակայն երբ դրանք սպառվում են, մթերքների պատրաստման համար օգտագործվում են սովորական բաղադրիչներ:
Հայցի պայմանների համաձայն՝ որպես տուգանք ստացված գումարը պետք է փոխանցվեր բոլոր տուժածներին: Քանի որ դա հավանական չէ, գումարը որոշել են բաժանել Դետրոյթի բժշկական կլինիկայի, ԱՄՆ-ում արաբական ազգային թանգարանի և փաստաբանների միջև:
