Վերջինիս դեմ սկսել են պայքարել օտար երկրների նախարարները: Երեկ Ուկրաինայի էկոնոմիկայի փոխնախարար Վալերի Պյատնիցկին, անդրադառնալով Սամվել Ալեքսանյանի կողմից արտադրված օղիների անվանումներին, որոնք խիստ նմանեցված են ուկրաինական օղիների անվանումներին և արտաքին տեսքին, ինչն էլ իր հերթին մոլորության աստիճան շփոթեցնում է սպառողներին, հայտարարել է, որ իր երկիրը բանակցում է Առևտրի համաշխարհային կազմակերպության հետ` նկատելով, որ եթե ԱՀԿ-ի միջոցով էլ հարցը չլուծվի, ուկրաինական իշխանությունները այլ միջոցներ կձեռնարկեն:
Ուկրաինացի օղի արտադրողներին հատկապես զայրացրել է պատգամավոր Սամվել Ալեքսանյանին պատկանող «Ալեքս Գրիգ» ընկերության անբարեխիղճ գործելաոճը: Ուկրաինական «Էկոնոմիչեսկի իզվեստիա» թերթը գրում է, որ «Ալեքս Գրիգի» արտադրած «Ուկրաինա» օղին անասելի նման է «Ուկրաինկա»-ին, որն արտադրում է ուկրաինական «Ալեֆ-Վինալ» ընկերությունը, «Խլոպվի» օղին հար և նման է ուկրաինական «Խորտիցա»-ին, «Պրեմիումը»` ուկրաինական «Պրայմ»-ին: Մոլորության մեջ է գցում նաև «Խլեբնի դար» անունով օղին: «Ալեքս Գրիգ»-ի էժան և կեղծված օղիների շրջանառությունից ստացված եկամուտները այնքան խոշոր են, որ Հայաստանի տնտեսական մրցակցության պաշտպանության պետական հանձնաժողովը այդ ընկերությանը ընդհանուր առմամբ 2, 5 միլիոն դրամի տուգանք էր նշանակել` օղու շուկայում անբարեխիղճ մրցակցության համար: Չնայած Ալեքսանյանը հանձնաժողովի որոշումները վիճարկում է, բայց, որպես կանոն, պարտվում է ու ստիպված վճարում այդ գումարները` շարունակելով իր կեղծարարությունը:
Տնտեսական մրցակցության պաշտպանության պետական հանձնաժողովի մամլո քարտուղար Գայանե Սարգսյանից տեղեկացանք, որ 2010թ.-ին անբարեխիղճ մրցակցության համար Սամվել Ալեքսանյանը տուգանվել է 12 անգամ և յուրաքանչյուր անգամ 500 հազար դրամի չափով: Ինչո՞ւ 2010թ.-ին, որովհետև որպես «Ալեքս Գրիգ» Սամվել Ալեքսանյանը գրանցվել է 2010թ.-ին: Ինչպես հայտնի է, նա հանդես է գալիս տարբեր անվանումներով, օրինակ` «Սալեքս Գրիգ», «ԼուսԱստղ» և այլն: Ինչպես տեղեկացանք Գայանե Սարգսյանից, տուգանքների մի մասը դատական կարգով վիճարկելուց և պարտվելուց հետո նա վճարել է սահմանված տույժերի մի մասը, իսկ մյուս մասը դեռևս դատական փուլում է, և հայտնի չէ, թե դատական գործընթացները երբ կավարտվեն: Հարկ է նկատել, որ նա դատական գործընթացների է դիմում ոչ թե տուգանքից խուսափելու համար, այլ` ամենաթող վիճակը երկարաձգելու: Սակայն ինչպես նշեց հանձնաժողովի մամլո քարտուղարը, ճիշտ է, Սամվել Ալեքսանյանը վիճարկել է հանձնաժողովի որոշումները, սակայն չի արձանագրվել մի դեպք, որ հանձնաժողովը պարտվի, այլ հարց է, որ նախկինում թույլ տված կեղծարարությունները շարունակվում են:
«Մտածել, որ դա հանձնաժողովի լուծելիք խնդիրն է` այդքան էլ այդպես չէ: Իրավասու այլ պետական մարմինների հետ միասին պետք է փորձենք այս խնդիրները լուծել»,-նկատեց Գ.Սարգսյանը:
Հիշեցնենք, որ 2010թ.-ի դեկտեմբերին ձվի շուկայում ստեղծված իրավիճակի հետևանքով Հանձնաժողովը ուսումնասիրություն էր սկսել, որի ընթացքում, ի թիվս այլ միջոցառումների, նաև ստուգումներ էր իրականացրել ձվի շուկայում աշխատող ընկերություններում: Ամփոփելով կատարած ուսումնասիրությունների և ստուգումների արդյունքները` Հանձնաժողովը անցյալ շաբաթ որոշում կայացրեց վարչական վարույթ հարուցել «Լուսակերտ» ՍՊԸ-ի նկատմամբ և տուգանել 100 մլն դրամի չափով` շուկայում գերիշխող դիրքը չարաշահելու համար: Գ.Սարգսյանից տեղեկացանք նաև, որ անբարեխիղճ մրցակցության համար «Լուսակերտը» տուգանվել է 10 անգամ` 5 միլիոն 500 հազար դրամի չափով: Տուգանքների մի մասը դատական կարգով վիճակվում է, մի մասն էլ արդեն բռնագանձվել է: Իսկ Հակամրցակցային համաձայնության համար նույն ընկերությունը տուգանվել է 40 միլիոն 481 հազար 200 դրամի չափով:
Հակամրցակցային համաձայնությունը նույն շուկայում 3 տնտեսվարողների համաձայնության ձեռքբերմամբ 4 մանր տնտեսվարող սուբյեկտներին շուկայից դուրս մղելու որոշումն էր: Արդյունքում` շուկայում ոչ թե ազատ գին է ձևավորվում, այլ ներքին` համաձայնեցված: Հարկ է նկատել, որ այս տուժերը 2007թ.-ին են սահմանվել: Նոր օրինագծով, որը ներկայացված է ԱԺ քննարկմանը, ավելի խիստ պատիժներ են նախատեսվում, ընդլայնվում են նաև հանձնաժողովի լիազորությունները:
Ներկայումս 500 հազար դրամը տուգանքի առավելագույն չափն է, որից ավելին հանձնաժողովը իրավունք չունի սահմանել: Մեր այն հարցին, թե տուգանքների ավելացման պայմաններում անբարեխիղճ մրցակցությունը որքանո՞վ կնվազի` Գ.Սարգսյանը պատասխանեց. «Դա վերացական հարց է: Օրինակ` Սամվել Ալեքսանյանը 1 տարվա մեջ 12 անգամ տուգանվել է, եթե դա իր համար նշանակություն ունենար, հերթական անգամ չէր դիմի այդ քայլն: Իսկ եթե գումարը մի քիչ ավելի բարձր լիներ, հնարավոր է նրան որոշ չափով սթափեցներ: Նոր օրենքով առաջարկում ենք տուգանել նախորդ տարվա շրջանառության մինչև 1 տոկոսի չափով, ինչը հսկայական գումար է: Հիմա կընդունվի, թե ոչ` ես չեմ կարող ասել»: Իսկ քանի դեռ օրենքները ևս անզոր են Սամվել Ալեքսանյանի դեմ, նա մի ձեռքով տալիս է մյուսով կրկնակին ստանում: Ինչպես ասում են, Սամվել Ալեքսանյանը սովոր է, որ իր երկու ձեռնափն էլ միաժամանակ են քոր գալիս, այլ հարց է, որ նա ավելի շատ ստանում է, քան տալիս:
«Ժամանակ» օրաթերթ
