Ռոբերտ Քոչարյանը դատի է տվել «Հրապարակ» օրաթերթին: Քոչարյանը պահանջում է հերքել թերթի՝ այս տարվա փետրվարի 12-ի համարում հրապարակված «Քոչարյանին ոչնչացնում են, Ծառուկյանին՝ բացատրո՞ւմ» խորագրով հոդվածը:
«Մենք իրավական բոլոր միջոցներն օգտագործելու ենք շահելու համար դատը և չդադարեցնելու թերթի գործունեությունը»,- մեզ հետ զրույցում ասաց «Հրապարակ»-ի գլխավոր խմբագիր Արմինե Օհանյանը:
Խմբագրի խոսքով, «Քոչարյանին ոչնչացնում են, Ծառուկյանին՝ բացատրո՞ւմ» հոդվածում չկա օրենքի որևէ խախտում:
«Սահմանադրությամբ յուրաքանչյուր ոք ունի կարծիք արտահայտելու իրավունք: Հոդվածը ընդամենը հրապարակախոսական նյութ է, որտեղ նույնիսկ տեղեկություն չկա, որ կարելի լիներ հերքել: Այդ հոդվածը զուտ վերաբերմունք է արտահայտում: Եթե Լուսինե Պետրոսյանը Ռոբերտ Քոչարյանին համարում է գավառական անձնավորություն, դա նրա կարծիքն է, և նա իրավունք ունի այն արտահայտել»,- ասում է «Հրապարակ»-ի խմբագիրը:
Քոչարյանի նպատակը թերթը փակելն է, նա որոշել է փակել բոլոր ընդդիմադիր թերթերը, թողնել միայն իշխանամետ մի քանի թերթեր և հեռուստատեսությունը` կարծում է Արմինե Օհանյանը:
«Հրապարակ»-ի խմբագիրը մեզ հետ զրույցում կարծիք հայտնեց նաև Մարդու իրավունքների պաշտպանի օրերս արած ուղերձի մասին:
«Այս ուղերձն իր բովանդակությամբ վատը չէ, այն բավականին ճիշտ շեշտադրումներ է անում, սակայն դա ընդամենը խորհուրդ է և ենթակա չէ պարտադիր կիրառման»: