Իշխանությունը պարզաբանում է` ինչու չի արտոնում ընդդիմության հանրահավաքաները

Այսօր «Նոր ժամանակներ» կուսակցության նախագահ Արամ Կարապետյանը ԱԺ ՀՀԿ-ական պատգամավոր Հովհաննես Սահակյանին հարցրեց, թե Ընտրական օրենսգրքում ինչո՞ւ պատասխանատվություն չեն սահմանում ընտրություններին չմասնակցելու համար։ Ավելին, չսպասելով Հովհաննես Սահակյանի պատասխանին՝ ավելացրեց. «Որովհետև այդ դեպքում չեք ունենա այն միլիոնը, որը Հայաստանում չէ, բայց մասնակցում է ընտրություններին։ Ավստրիալիայում, Բելգիայում, Սան Մարինոյում քրեական պատասխանատվության են ենթարկում նրանց ովքեր չեն մասնակցում ընտրություններին»։ Արամ Կարապետյանին ի պատասխան՝ Հովհաննես Սահակյանն ասաց, որ, ի տարբերություն նախորդ տարիների, հիմա իրենք թույլատրում են, որ նկարահանեն ընտրությունների ընթացքը։ Արամ Կարապետյանը հարցրեց, թե Հայաստանում քանի տեղամաս կա, և ստացավ «մոտ 2 հազար» պատասխանը։ «Հիմա, ձեր կարծիքով, ո՞ր կուսակցությունը կարող է ընտրությունների համար 2 հազար տեսախցիկ ապահովել»,- հարցրեց Արամ Կարապետյանը, որին Հովհաննես Սահակյանը միանշանակ պատասխան չտվեց։
Ի դեպ, ինչ վերաբերում է Ազատության հրապարկում իշխանության կողմից հանրահավաք չարտոնելու խնդրին, Հովհաննես Սահակյանը նկատեց. «Երբ անցյալ անգամ ընդդիմությունը մտավ Ազատության հրապարակ՝ ի՞նչ արեց, որ հիմա արտոնենք»։ «Ոչինչ, խաղաղ պայմաններում 10 քաղաքացի սպանվեց, որոնց սպանության հանգամանքները մինչ օրս իշխանությունները չեն լուծել։ 3 տարի է՝ չեն կարողանում սպանության հանգամանքները բացահայտել, բայց ոչ մի իրավապահ չի պատժվում։ Մի քանի իրավապահի փոփոխությամբ ամբողջ իրավական համակարգը հնարավոր չէ փոխել։ Վենեսուելայում այսօր արդեն ամբողջ իրավական համակարգն են փոխում, քանի որ կոռուպցիան ահագնացող չափերի է հասել։ Այնինչ, մեզ մոտ մի քանիսին են փոխում, ինչը չի կարող համակարգային փոփոխությունների հանգեցնել»,- նկատեց Արամ Կարապետյանը։ Հովհաննես Սահակյանը խոստացավ զեկուցել այդ մասին։ Իսկ ինչ վերաբերում է հանրահավաքը արտոնելուն, Հովհաննես Սահակյանը նշեց, թե չեն արտոնում, որ ընդդիմությունից ժողովուրդը չհիասթափվի։ «Այդ դեպքում իշխանության համար ավելի շահավետ է, որ հանրահավաքը արտոնի, իսկ ժողովուրդը հիասթափվի։ Այնպես որ, դուք ձեր գործն արեք, մենք մերը կանենք»,- պատասխանեց Արամ Կարպետյանը։