Հունվարի 21-ին Օբաման կյանքում երկրորդ անգամ երդում կտա որպես ԱՄՆ նախագահ: Մասնավոր արարողությունը տեղի կունենա Սպիտակ տանը` կեսօրին (Երևանի ժամանակով ժամը 21:00-ին):
Արարողությանը կմասնակցեն միայն պետության ղեկավարի ընտանիքի անդամները, վարչակազմի որոշ աշխատակիցներ և ԱՄՆ փոխնախագահ Ջոզեֆ Բայդենը, որը նույնպես պետք է երդմնակալի: Արարողությանը լրագրողներից կմասնակցեն միայն նախագահի աշխատակազմի ներկայացուցիչները:
Արարողությունից առաջ Օբաման ծաղկեպսակ կդնի Անհայտ զինվորի գերեզմանին` Առլինգթոնի գերեզմանատանը, իսկ երեկոյան պետության ղեկավարն ու փոխնախագահը հանդես կգան ելույթներով:
Ավելի վաղ հաղորդվում էր, որ Օբամայի երդմնակալությանը հանդես կգան հանրահայտ աստղեր, մասնավորապես` երգչուհի Բեյոնսեն կերգի ԱՄՆ-ի ազգային հիմնը, հայրենասիրական երգեր կերգեն Ջեյմս Թեյլորը և Քելի Կլարքսոնը:
Այդ ամենը տեղի կունենա Կապիտոլիումի աստիճանների վրա, և Բարաք Օբաման ելույթ կունենա ԱՄՆ-ի հավաքված քաղաքացիների առջև: Ինչպես սպասվում է՝ երդմնակալությանը կմասնակցի ավելի քան 1 մլն մարդ:
Փորձագետների գնահատականներով՝ այս տարի երդմնակալության արարողության ծախսերը, նախորդ տարիների համեմատ, ռեկորդային կլինեն:
Երդմնակալության պաշտոնական արարողությունները Կապիտոլիումի մոտ տեղի կունենան հունվարի 21-ին: Բանն այն է, որ ԱՄՆ Սահմանադրության համաձայն` նախագահը պետք է երդմնակալի հունվարի 20-ին, իսկ այդ օրն այս տարի համընկնում է կիրակի օրվան: Այսօր փակ են դատարաններն ու այլ պետական հաստատություններ, այդ իսկ պատճառով Օբաման կերդմնակալի կրկնակի:
