Ամերիկայի Հայ դատի հանձնախումբը շնորհավորել է նախագահ Բարաք Օբամային և կոչ է արել հանդիպել ամերիկահայության ղեկավարների հետ:
«Ազատություն» ռադիոկայանի փոխանցմամբ՝ հանձնախումբը Բարաք Օբամայի երդմնակալության առիթով երեկ հղած շնորհավորական ուղերձում նախագահին կոչ է արել «թարմացնել» իր հարաբերությունները ամերիկահայերի հետ և նախաապրիլքսանչորսյան հանդիպում անցկացնել նրանց ղեկավարների հետ:
«Շնորհավորում ենք Միացյալ Նահանգների նախագահի պաշտոնում վերընտրվելու կապակցությամբ, ողջունում ենք Ձեր երդմնակալությունը, և երկու միլիոն հայկական ծագում ունեցող ամերիկահայերի անունից վերահաստատում ենք մենք շահագրգռվածությունը Ձեր վարչակազմի հետ աշխատելու` համահունչ Միացյալ Նահանգների քաղաքականությանն ու սկզբունքներին, որոնք Դուք բերել եք Սպիտակ տուն», – ասված է ուղերձ-նամակում:
Նույն օրը ավելի վաղ մեկնարկել է Հայ դատի հանձնախումբի առցանց նախաձեռնությունը, որի շրջանակում Բարաք Օբամային ուղղակի հարց է տրվում. «Ե՞րբ եք կատարելու Հայոց ցեղասպանությունը ճանաչելու Ձեր խոստումը»:
«Հայաստանը և ամբողջ աշխարհն այսօր պակաս ապահով է` անպատիժ մնացած ցեղասպանության այդ սոսկալի նախադեպի պատճառով», – գրում են նախաձեռնության հեղինակները` շարունակելով. – «Մինչև գալիք ապրիլի 24-ը դեռ ժամանակ կա` կատարելու Ձեր հանձնառությունը և ձևակերպելու Ամերիկայի ճիշտ դիրքորոշումը մարդկայնության և մարդու իրավունքների այս հիմնարար հարցում»:
