Ասլան Ուսոյանի՝ Դեդ Հասանի մարմինը Վրաստանում հուղարկավորելու խնդրանքը երկրի իշխանությունների կողմից մերժելու պատճառով Դոնեցկից հետ՝ Մոսկվա են տեղափոխել քրեական հեղինակության դին: Այս մասին Interfax-ին հայտնել է իրավապահ մարմիններում աղբյուրը:
«Ավելի վաղ Ուսոյանի ազգականները դիմել էին վրացական իշխանություններին՝ խնդրելով թույլատրել նրա մարմինը հողին հանձնել այն երկրի տարածքում, որտեղ ծնվել է քրեական հեղինակությունը»,- հաղորդել է Interfax-ի աղբյուրը:
Հիշեցնենք՝ երեկ հայտնի դարձավ, որ Ուսոյանի դին տեղափոխել են Դոնեցկ, որտեղից ծրագրվում էր հանգուցյալի մարմինը հասցնել Վրաստան, սակայն վրացական իշխանությունները չեն թույլատրել նրա հուղարկավորությունը Վրաստանում:
«Այսօր Ուսոյանի դագաղը վերադարձրել են Մոսկվա, ամենայն հավանականությամբ, Դեդ Հասանը կհուղարկավորվի Մոսկվայի Դանիլովյան գերեզմանատանը»,- ասել է գործակալության աղբյուրը:
«Ռուսթավի-2» հեռուստաընկերության տվյալներով՝ Թբիլիսիում Ուսոյանի ազգականները հայտարարել են, որ հենց կառավարությունը ու անձամբ Վրաստանի ներքին գործերի նախարար Իրակլի Գարիբաշվիլին են հանձնարարել չընդունել Ուսոյանի դագաղով Մոսկվայից Վրաստան թռչող ինքնաթիռը: Ավելի ուշ Թբիլիսիի օդանավակայանը հրաժարվել է մեկնաբանել տվյալ տեղեկատվությունը:
Հիշեցնենք, որ 75-ամյա Դեդ Հասանը հունվարի 16-ի կեսօրին Մոսկվայում սպանվել է դիպուկահարի կրակոցից:
