Դեկտեմբերի 22-ից սկսած ամեն օր «Հայկական ժամանակ»-ի աչքը ճամփին է: Այդ օրվա թերթի համարում Հանրապետական կուսակցության խորհրդի անդամ Հովհաննես Սահակյանը շատ պատասխանատու հայտարարություն էր արել: «Ես կարող եմ բազմահազար մեր հայրենակիցների ի ցույց դնել, ովքեր կասեն, որ երկրի ապագան կապում են Սերժ Սարգսյանի հետ, նա է, որ ի վիճակի է այս գլոբալ մարտահրավերներին, այս արագ զարգացող աշխարհում կառավարել և անվտանգ մեր ժողովրդին տանել դեպի սահուն զարգացում»,- ասել էր Սահակյանը:
Թերթն էլ նույն օրը կոչով դիմեց հանրապետական պատգամավորի մատնացույց արած քաղաքացիներին. «Կոչ ենք անում մեր այն բազմահազարանոց հայրենակիցներին կամ գոնե, նրանցից մեկ-երկուսին, ովքեր երկրի ապագան, ինչպես Հովհաննես Սահակյանն է պնդում, կապում են Սերժ Սարգսյանի հետ, այցելել մեր թերթի խմբագրություն: Մենք հաճույքով կզրուցենք նրանց հետ և կհրապարակենք: Կոչը չի վերաբերվում օլիգարխներին, նրանց ընտանիքների անդամներին, աշխատողներին, տարբեր պաշտոնյաների հետ փոխկապակցված և հատկապես, Սերժ Սարգսյանի շրջապատին մոտ կանգնած անձանց»:
«Եվ ահա, արդեն մեկ ամիս է, աչքներս ջուր է կտրում: Խմբագրություն այցելող յուրաքանչյուր քաղաքացու հետ վեր ենք թռչում, թե՝ ահա, գտնվեց այն մարդը, ով եկել է ասելու, որ ընտրելու է Սերժ Սարգսյանին և երկրի ապագան կապում է նրա հետ: Բայց ամեն անգամ խոր հիասթափություն ենք ապրում, քանի որ պարզվում է, որ հերթական այդ քաղաքացին էլ միայն բողոքելու է եկել, նրա հետ էլ են պետական կառույցներում անարդար վարվել, երկրորդի՝ որդուն են անարդար դատել, երրորդի տան մուտքը օլիգարխներից մեկը իր մեծ շինությունով է փակել, չորրորդին՝ գումար է հարկավոր, թոշակը չի բավարարում և այսպես շարունակ: Իսկ բազմահազար մեր հայրենակիցներից գոնե մեկը, ով Սերժ Սարգսյանի ընտրողն է ու երկրի ապագան նրա հետ կապողը՝ չկա ու չկա:
Ի դեպ, վերջերս սոցիոլոգ Ահարոն Ադիբեկյանը հայտարարեց, որ ըստ իրենց անցկացրած հարցումների, կողմնորոշված ընտրողների 73 տոկոսը ընտրելու է Սերժ Սարգսյանին: Ու թեև, կողմնորոշված ընտրողները չնչին տոկոս էին կազմում, իսկ փոխարենը, Ադիբեկյանի հարցումներով ընտրողների 80 տոկոսը մտադիր չէ ընտրել Սերժ Սարգսյանին, այնուամենայնիվ, ցանկանում ենք շարքային քաղաքացիների հետ մեր թերթում հրապարակված հարցում-հարցազրույցների արդյունքներն էլ ամփոփել:
Ըստ այդմ, կողմնորոշված ընտրողների 100 տոկոսը ընտրելու է Սերժ Սարգսյանին: Հարցազրույց տված 14 ընտրողից վեցը կողմնորոշվել էին, բոլորն էլ ընտրելու են Սարգսյանին, իսկ ութը՝ չէին կողմնորոշվել: Ու որքան էլ, Հովհաննես Սահակյանի սրտով չլինի, նրանցից ոչ ոք երկրի ապագան Սերժ Սարգսյանի հետ կապելով չէ, որ ընտրելու է նրան:
Ընտրող 1. «Ես ընտրելու եմ գործող նախագահին, որովհետև ես պարտավոր եմ իրան տալու, որովհետև ես գործի միջի մարդ եմ: Այսինքն՝ մի հատ փոքր հիմնարկ կա, աշխատում եմ, 30 հազար փող եմ ստանում, իմ ընտանիքը պահում եմ»:
Ընտրող 2. «Հանրապետականին եմ ընտրելու… Դե մարդը լավից վատից տիրություն ա անում… Հիմի սենց, գոնե կողից, հարևանները պարտքով տալիս են, կարող ա էն վախտ, որ ուրիշը գա, դառնա նախագահ, պարտքով փող էլ չտան»:
Ընտրող 3. «Սերժ Սարգսյանին եմ ընտրելու…Մեր գյուղը, օրինակ, սաղ պատկանում ա Հանրապետական կուսակցությանը, ընդե ոնց ասեն, ընենց էլ անում ենք: Ես էլ եմ Հանրապետական կուսակցությունից»:
Ընտրող 4. «Մենք ընտանիքով Հանրապետական կուսակցությունից ենք, պարզ ա՝ ում կընտրենք»:
Ընտրող 5. «Սերժ Սարգսյան եմ ընտրելու… Դրական չի էղել, բացասական էլ չի էղել, սենց էլ որ մնա՝ վատ չի: Ժողովուրդը մի հատ լավ բան ա ասում, չէ՞: Ասում ա. «Նաղդը մի փոխի նիսյայի հետ»…Բա լավ ու՞մ ընտրենք:
Ընտրող 6. «Ես հիմնականում, որ աշխատում եմ, դրա համար ես պետք ա ընտրեմ Հանրապետական կուսակցության թեկնածուին»:
Ահա, այսպիսի 100 տոկոսանոց արդյունք: Իսկ մենք դեռ սպասում ենք բազմահազար մեր հայրենակիցներից այն մեկ հոգուն, ով կայցելի մեր խմբագրություն և կասի, որ հիմնվելով իր ազատ կամքի, գիտակցության և համոզմունքների վրա՝ ընտրելու է Սերժ Սարգսյանին»,- գրում է «ՀԺ»-ն:
