Թուրքիայի Քոնյա քաղաքի ավագ դպրոցի աշակերտը, որն ավելի վաղ ձերբակալվել էր երկրի նախագահ Ռեջեփ Թայիփ Էրդողանին հրապարակավ վիրավորելու մեղադրանքով, դատարանի որոշմամբ ազատ է արձակվել: Այս մասին հայտնում է TASS-ը՝ հղում անելով տեղական հեռուստատեսությանը:
Միաժամանակ, 16-ամյա դեռահասի գործը չի փակվել, նա ենթակա է հետապնդման և մնում է դատական վերահսկողության տակ: Հետագայում նա կկանգնի դատարանի առաջ, բայց արդեն ոչ կալանավորվածի կարգավիճակով:
Ոստիկանությունը դպրոցականին ձերբակալել էր հենց դասի ժամանակ: Նրա ձերբակալությունը հիմնավորվել է Facebook-ում նրա ստեղծած էջով, որի միջոցով դեռահասը սովորողներին կոչ է արել ցույցի դուրս գալ՝ ի հիշատակ 1930թ. ծայրահեղականների ձեռքով սպանված ուսուցչի և թուրքական բանակի սպայի: Ուղերձում, որն էլ դատի պատճառ է դարձել, դպրոցականը նշել է, որ իր կողմնակիցներն «Էրդողանին համարում են կոռուպցիայի, գողության և կաշառակերության առաջնորդ»:
Դատական նիստի ժամանակ դեռահասն իրեն մեղավոր չի ճանաչել՝ հայտարարելով, որ Էրդողանին վիրավորելու մտադրություն չի ունեցել:
