Չնայած ՀԱԿ-ը որոշել է չմասնակցել նախագահական ընտրություններին, այնուամենայնիվ, հրավիրում են նիստեր, վերջնական ձևաչափ որոշում: «ՀԱԿ-ում ինչ կատարվում է, նորմալ քաղաքական գործընթաց է: ՀԱԿ-ում բոլոր հարցերը լուծվում են կոնսենսուսի պարագայում. չկա կոնսենսուս, չկա լուծում: Եթե կան սխալներ, որ մատնանշում են մեր գործընկերները, մեզ համար ընդունելի է, բայց` եթե դրա հետ մեկտեղ կան առաջարկություններ: Եթե քննադատում են, պետք է լուծումներ առաջարկեն, հակառակ դեպքում լինում է դատարկ, անհարկի քննադատություն»,- Հանրային հեռուստաընկերության «Հարցազրույց» հաղորդման եթերում ասել է «Ժողովրդի իշխանություն» հասարակական-քաղաքական նախաձեռնության ղեկավար Զոյա Թադևոսյանը:
ՀԱԿ-ում տարաձայնությունները, նրա խոսքերով, ակտիվացան Լևոն Տեր-Պետրոսյանի հայտարարությունից հետո` առ այն, որ չի մասնակցելու ընտրություններին: «ՀԱԿ անդամ կուսակցությունները վստահ էին, որ առաջադրվելու է, որովհետև իրենք դա էին ուզում: Բայց Լևոն Տեր-Պետրոսյանը երբեք չի ասել, որ առաջադրվելու է»:
Զոյա Թադևոսյանը նշել է, որ միայն Տեր-Պետրոսյանն է ունակ առաջընթացի հույս ապահովել այս ճգնաժամային իրավիճակում: Նա քննարկումներ էր անցկացնում ԲՀԿ–ի և ՀՅԴ-ի հետ. արդյունքում այդ ուժերը հրաժարվեցին մասնակցել, և երևաց, որ ինքը միայնակ չի կարող:
Ժողովրդի համար, ըստ ՀԱԿ անդամի, կարևոր չէ` ով կլինի նախագահ, այլ ինչպես կլինի և ինչ կլինի հետո: Նրա խոսքերով՝ ընտրություներ չեն լինում, և իմանալով, որ ձախողվում ես՝ գնալ ընտրությունների ու բախումների, անիմաստ է, մանավանդ որ բախումներ կլինեին:
«Այն թեկնածուները, որ դիմել են ընտրական փոփոխություն անելու նպատակով և չեն ստացել դրական պատասխան և գիտակցաբար մտնում են պայքարի մեջ, անտրամաբանական է»,- ասել է Զոյա Թադևոսյանը:
