ՀՀ երկրորդ նախագահ Ռոբերտ Քոչարյանի 2-rd.am կայքում այսօր «Վերադարձի առաջին քայլը» վերնագրով ծավալուն վերլուծություն է տեղադրվել, որում անդրադարձ կա երեք օր առաջ «Մեդիամաքս» գործակալությանը Ռ. Քոչարյանի հարցազրույցի արձագանքներին և նրա հետագա գործունեությանը:
«Սկսվում է միանգամայն նոր փուլ, և կարող ենք վստահորեն ենթադրել, որ նա այլևս չի սահմանափակվի միայն հազվադեպ հարցազրույցներով և կընդլայնի իր հրապարակային գործունեության դաշտը: Փաստորեն, արդեն անցյալում են նաև այն դրդապատճառները, որոնք խոչընդոտ էին ակտիվ քաղաքականություն Ռոբերտ Քոչարյանի վերադարձին: Լևոն Տեր-Պետրոսյանն, ըստ էության, հայտարարել է քաղաքականությունից իր վերջնական հեռացումի մասին, գործող նախագահն իր նախագահության երկրորդ ժամկետին է գնում և երեք նախագահների մրցակցության այն ձևաչափը, որը Ռոբերտ Քոչարյանը արատավոր էր համարում, այլևս գոյություն չունի:
…Ամփոփելով` ցանկանում ենք բավարար վստահությամբ պնդել, որ այսքան ջուր խմած այս հարցազրուցով Ռոբերտ Քոչարյանն իր վերադարձի առաջին քայլն է անում: Պետք է աչք ունենալ` այդ տեսնելու համար, և ականջ ունենալ` լսելու համար: Անկախ այն հանգամանքից, թե ում սրտով է և ում ոչ` Ռոբերտ Քոչարյանը մեր ժամանակների ամենափորձառու և ամենամեծ ներդրում ունեցող պետական գործիչն է, և անհրաժեշտ է, որ վերադառնա մեծ քաղաքականություն: Սա արդեն անխուսափելի է թվում, և խորհուրդ կտայինք հաշտվել այս իրողության հետ, և հետագա տարիների դեպքերի ընթացքին նայել հենց այս պրիզմայի միջով»,- գրում են Ռոբերտ Քոչարյանի կայքում հրապարակված հոդվածի հեղինակները:
